Husto ba gud ni?

Pipila sa mga tawo nga namatyan og kabanayan nga miadto sa City Hall kaniadtong miaging Huwebes aron pagkobra sa burial assistance, nahimangod kay gipapaabot sila og kapin sa tulo ka oras usa ipanghatag ang tseke kanila.

Kay magsul-ob man gayud ko og Identification Card (ID) nailhan ko nila nga sakop sa media mao nga gitawag nila ang akong atensyon. Diha-diha nga gipadangat nako ang ilang sentimento ngadto ni City Hall employee Ben Baculi nga maoy nagdumala sa Burial and Hospital Assistance. Apan gibarugan ni Baculi ang ilang pamaagi nga pahuwaton og kapin sa tulo ka oras ang mga tagtungod sa namatay usa hatagan sa ilang tseke. Matud ni Baculi nga estelo kuno ni Mayor Michael Rama nga siya gayud ang mohatag sa tseke.

Akong gitimbang-timbang pag-ayo ang sentimento sa mga kabanay sa namatay ug sa tubag ni Baculi. Hinoon, lainlain man gayud ang sestima sa magdumala sa kagamhanan.

Si Rama gusto gayud kuno nga siya ang motunol sa tseke ngadto sa kabanayan sa namatay dili sama ni kanhi mayor Tomas Osmeña nga itugyan ra sa iyang mga sakop ang maong gimbuhaton.

Sayonan ka nga paanhaon nila ang mga mokobra sa burial assistance alas nueve pa sa buntag unya hatagan sila sa tseke mga alas 12 na kay daghan man og lakaw ang mayor. Kanunay nako nga makit-an nga magbuwa-buwa na lang gud ang baba ni Ben Baculi nga magbalik-balik na lang sa pagdiskutir unsaon pagkobra ang burial assistance. Kun pul-an na si Baculi sa pagsigi’g sulti nga dili pa moabot ang mayor, mopuli na usab ang kauban niya nga mao ra gihapon ang isulti.

Wala hinoon nako pangutan-a si Baculi kun tinood ba ang pagduda sa ubang tawo nga gigamit niya ang maong forum nga mainila siya kay may tinguha ra ba kini nga magkonsehal sa dakbayan.

* * *

Gitimbang-timbang nako pag-ayo ang sitwasyon. Nganong si Mayor Rama pa man gayud ang kinahanglang motunol sa tseke ngadto sa mga kabanay sa namatay?

Buyno, wala man tingali problema kun ang mayor gayud ang motunol sa tseke sa kabanayan sa namatay apan dili tingali pahuwaton sila’g tulo ka oras o kapin pa gani nga mag-antos sa kagutom. Kun pamolitika ang tumong nila ni Baculi sa paghimo sa maong sistema, tambag nako nga moresulta hinoon kini og dili maayo kay maglagot na man hinoon ang mga kabanay sa namatay.

Tiaw mo nga makadawat ka man tuod og P10,000 nga burial assistance pero paantuson ka’g huwat og kapin sa tulo ka oras nga anaa na man unta ang tseke.

Bisan pa og dili si Mayor Rama ang motunol sa tseke ngadto sa kabanay sa namatay nasayud man sila nga ang mayor sa dakbayan mao si Rama. Si Rama hinoon mopahinumdom sa kabanayan sa namatay kabahin sa tukma nga paghipos sa mga basura.   Apan kini mahimo ra ni Baculi ang pagpahinumdom kun unsaon ang tukma nga paghipos sa mga basura. Aw, kun moinsister si Baculi nga husto ang iyang pamaagi, anaa ra niya apan nagtoo ko nga imbis makaayo, makadaut hinoon kini sa tinguha ni Mayor Rama nga magpasubli sa eleksyon karong sunod tuig.

Kun ako’y pahukmon, mas maayo pa nga ihatag na lang ang tseke kana kun ang mayor dili makahatag kanila og tukma nga oras. Mahimo usab nga paanhaon ang mga claimants sa tseke alas 11 na, dili kay alas nueve.

Samtang gidayeg nako ang hapsay nga sistema nga gipatuman ni Ben Baculi, wala ko makagusto niining paagiha.