Makasohan ang magpabaya

Giapas sa asawa ang iyang bana nga miinom og tuba kay dugay nga mipauli. Giangkon sa asawa nga nakainom usab siya kay iyang gitabangan sa pag-inom ang iyang bana kay dili man mopauli kun dili mahurot ang tuba nga giinom niini. Ang uban nilang silingan miingon nga adunay mga panahon nga biyaan sa magtiayon ang ilang mga anak kay mangdisko. Ambot og unsa ni katinuod. Kun ugaling adunay mobarog ug mopamatuod puweding mapasakaan og kasong kriminal ang nagpabayang mga ginikanan ubos sa Akta Republika 7610 o Special Protection of Children Against Abuse, Exploitation and Discrimination Act.

Ang duha ka mga bata nga nangamatay human masunog ang ilang panimalay kaniadtong Biyernes sa gabii sa dakbayan sa Toledo dili pa angayan nga biya-biyaan sa ilang mga ginikanan gumikan kay sila dos ug singko anyos pa lamang.Wala pa silay saktong buot nga makalusot sa unsa mang trahedyang moabot gawas lang seguro kun sa Diyos sila panalipdan.

Dili na bag-o kanato ang mga kaso sa pagpabaya sa mga ginikanan ngadto sa ilang bata tungod kay kadaghan na kini mahitabo dinhi sa ato. Pero bisan og klaro na kaayo kining nahimo sa mga ginikanan, wala pa gayoy usa kanila nga atong nahibaw-an nga napasakaan og kaso. Mao seguro kini ang hinungdan nganong dili magpanagana ang ubang ginikanan sa pagpasagad lamang sa ilang mga anak.

Ang Department of Social Welfare and Development angayan nang mopabato sa ilang mga kasing-kasing ug motinuod ngadto sa mga ginikanan nga nakahimo og krimin ngadto sa ilang mga anak pinaagi sa pagpabaya aron sa ingon maminus-minosan kun dili man mawagtang ang mga kaso sa pagpabaya nga miresulta sa kamatayon.

Ang nahitabo sa duha ka mga bata leksyon upod ngadto sa mga asawa nga mag apas-apas sa ilang mga bana. Kamong mga asawa ayaw mo pag apas-apas sa inyong mga bana. Kamo pong mga bana, ayaw upod mo pagpa apas-apas sa inyong mga asawa.