Nagkadaghan na karon ang mga museum ug mga heritage site dinhi sa Sugbo nga moapil alang sa gikatakdang Gabii sa Kabilin karong tuiga gikan sa 18 sa miaging tuig ngadto na sa 21 ka mga museum ug heritage site niining higayona.
Ang Gabii sa Kabilin or Night Heritage nga pagahimoon nga gipasiugdahan sa Ramon Aboitiz Foundation Inc.(RAFI) nakuha kini gikan sa Germany ug uban pa nga European nga mga nasud nga gitumong alang sa pagdasig sa publiko sa pagbisita ug pagtan-aw sa nagkadaiyang mga museum nga maoy nagsilbing dapit alang sa pagsabot sa kaugalingon natong kultura.
Ang miapil nga mga museumn ug mga heritage site bukas sa pagtan-aw sa publiko hangtod sa tungang gabii ug ang matag establisamento adunay giandam nga mga programa ug kalihokan nga naghatag og kamahinungdanon niini.
Gisugdan ang mga kalihokan sa matag Biyernes sa gabii niining bulan sa Mayo niining tuiga nga mao usab ang bulan sa pagsaulog sa International Museum day ug National Heritage.
Ang mga bag-ong participating sites mao ang Ayala Center Cebu, Fo Guang Chu Un Temple, BPI Museum, CAP Theater, JRG Halad Museum ug University of San Carlos Museum.
Dugang nga mga gihan-ay nga kalihokan ang Gabii sa Kabilin karong tuiga nga naglakip niini ang cultural performances, exhibit, art fairs, food markets, interactive demonstrations ug ingon man mga kalihokan alang sa kabataan sa pinili nga sites ug ingon man usab ang pagsakay sa tartanilla.
Kahinumdoman nga ang Gabii sa Kabilin unang gisugdan niadtong Mayo 25, 2007 diin natigayon kini pinaagi lamang sa upat ka mga museum sa dakbayan sa Sugbo.
Sa pagdis-og sa katuigan maoy namatikdan nga nagkadaghan na usab ang mga miapil nga museum nga maoy nakaingon usab sa nagkadaghan nga langyaw nga turista ug mga dumoduong nga mibisita niining panahona.