Ang kapakyas sa Pamuno nasud pagsanong sa awhag sa mga mamumuo nga maoy payamaron nga paumentohan ang ilang suhol labing nakapalusno sa ilang paglaum nga makatuyhakaw pa ang ilang panginabuhi ugma damlag.
Kini luyo sa kakuwang nila sa alamag nga ang labing makapakanaog og desisyon bahin sa umento sa suholan mao ang Regional Tripartite Wages and Productivity Board nga way masakitan tungod kay mao man kini grupo sa mga representante sa mga negosyente kon mga amo, pamuo o mga trabahante ug nagkalainlaing mga ahensya sa gobiyerno nga may labot sa pagsukod angay bang ipatuman ang umento sa suholan, ug pila man usab kun ugaling angay man. Apan sa katibuk-ang hitsura sa kahimtang sa pagpuyo sa mga mamumuo nga maoy direktementeng masantako niining sistema sa edukasyon nga K+12, murag sagkaon kaayong mahitabo nga ang kadaghanon sa mga gradwado sa kolehiyo niining kasamtangang sistema, mao gihapon o kaha molabaw pa ang gidaghanon sa mga mograduwar matag tuig inig sugod na og epekto sa K+12.
May kalabaka ang kadaghanan nga mokibra ang porsiyento sa gidaghanon sa mograduwar matag tuig niining K+12 tungod kay magbaha ang mga drop out gumikan sa kapobre sa mga ginikanan nga wa nay ikasugakod sa ginastuhay sa pagtungha sa ilang mga anak. Karon gani kun di pa pugson sa mga opisyal sa kagamhanan nga patunghaon ang mga bata sa elementarya, gumikan sa kakabus, daghan kaayong mga ginikanan nga di mohatag og pagtagad sa edukasyon sa ilang mga anak.
Busa inig graduwar sa elementarya, maglisud na sa pagpatungha sa ilang mga anak sa high school ug labaw sa tanan sa kolehiyo.
Mas bubintaha unta kun niining pagpatuman sa K+12 mosaka na ang kahimtang sa panginabuhi sa mga ginikanan ug makatuo kita nga makasuporta sila hangtud mograduwar sa kurso nga kuhaon niini.
Kay kun ang kakabus sa mga ginikanan karon ning kasamtangang sistema sa edukasyon mao lang gihapon inig patuman na nga hingpit sa K+12, aw mao nay pag-ingnon, ang kapobre plus K+12 equals intonsis ang edukasyon sa mga anak. Di ba?