Sagad sa malampuson

Dili ikalimod nga dunay pipila kanato o kadaghanan nga usahay mawad-an na sa paglaum. Og hilabihan ang kaguol ilabi nag wala siya makatapos sa iyang gipangandoy nga pagtapos sa pag-eskuyla o kurso, nga maoy gihimong sukdanan sa iyang gituhoang kalamposan sa pakigbisog o indigay sa kinabuhi.

Busa gihimo ta kining lindog karon sa pamasin matuis ang maong pagtoo, aron kahatagan og tukmang giya o kaalam kun unsa gyud ang tiunay nga pasikaran nga ang tawo mahimong malampuson sa buot niyang kab-oton ning kinabuhia. Ang unang buhaton nato, mao nga duna tay panlantaw. Dili igo nga magdamgo kundili pursigido gayud nga buhaton ang gipangandoy.

Kanunay magtoon sa isigkatawo, sa ilang kahimoan sa kapakyasan o kalamposan. Unsay mga rason, ngano naingon sila niana. Moduyog sa panahon ug palibot. Maisogon makigharong sa pagsulay. Kun buot kang ilhong mabuot sa katilingban, dili ka mahadlok moharong nga makighinabi o makig-estorya ni bisan kinsa. May baruganan o prinsipyo sa kaangayan. Mag-obserbar nga makigsandurot nga mahigalaon. Kapiyalan o kasaligan. Kridebli sa pagsulti ug pagbuhat. Maunongon ug matinud-anon sa pag-alagad nga matinabangon.

Ubanan sa batasan o kinaiya nga mahinangpon ug dali ikasabot sa mga tawo. Sa laktod maantigo kang moduyog nga ilambigit ang imong kaugalingon sa mga kaakohan nga motumong ngadto sa padulngan mong gipangandoy. Kulang ka man sa edukasyon basta may bulawanon kang hiyas, molampos ka.