EDITORYAL - Dako kaayo og lihay ang US

Ambot bisan pa tingale og santakuhon o kupogang physical sa China ang mga sundawo sa Pilipinas didto sa Scarborough Shoal, ang US igo lang tingale sa pagpabati og suporta sa pulong apan way buhat.

Di man nato mabati ang ilang pagbasul sa kagamhanan sa Pilipinas gumikan sa pagpapahawa sa ilang base, apan tataw kaayo nga kanus-a pa man di sila gustong malambigit niining personal nga bangi sa Pilipinas ug China .

Kay una sa tanan murag nagawngan na sa China ang US dihang mibubo ang mga Insek og 45 bilyones ka dolyar nga investment didto sa US aron pagsapwang sa maong nasud gikan sa pagkalukapa sa ekonomiya niini sa miaging tuig ug gani hangtod karon nagsusapinday pa ang US gikan sa epekto sa recession niini.

Sa bahin sa US gitataw niini nga andam lang silang mosuporta sa Pilipinas pinaagi sa mga training sama sa ilang gihimo ubos sa kasabotan kabahin sa Visiting Forces Agreement nga buot na usab untang ipawagtang sa mga cause oriented nga grupo sa Pilipinas.

Kay unsa pa man gyuy interes sa America dinhi sa nasud nga una sa tanan wa na silay mga base dinhi human sila hinginli sa mga magbabalaod sa atong nasud.

Kun huwaman nato ang mga pinulongan sa mga bugoy, tataw baya kaayong moingon ang US sa Pilipinas nga “soloha na ninyo, kaniadto gipatiran mi ninyo ug gipapahawa ang among mga base militar unya karon nagkinahanglan diay mo namo”?

Unya nahinumdom na ang kagamhanan sa Pilipinas karon sa US-Phls Defense Treaty, para sa unsa man?

May nawong pa bang ikaatubang ang nasud aron mangayo og hinabang sa US human nato sila isig-isiga tungod lang kay may mga base sila dinhi sa nasud?

Ang maayong mopakgang sa China kun gusto man gyung mosukol ta kanila og pasingit , mao kadtong mga magbabalaod kaniadto nga isog kaayong mihingilin sa mga base sa America.

Tungod kay sa ilang paghingilin sa mga puwersa sa US nagpasabot nga wa na kita magkinahanglan kanila kay may ikasarang na kita kun may laing nasud nga mosuway sa pagbugal-bugal kanato. Di ba?