Si Super-vening!

Buloy: Ngano kaha no nga gahi man kaayo mohatag og umento sa suholan ang mga magpapatigayon sa mga mamumuo?

Bitoy: Dili man gud na sila mga anak sa singot.

Buloy: Unsa man diay na sila?

Bitoy: Mga anak sa aircon(Toink!/Ayay!)

Hehehehehehehehehehehehehe!

Kun si Presidente Benigno Aquino III maoy pasultihon angayang paspasan sa mga sakop sa Regional Tripartite Wages and Productivity Board ang pagtuon sa umento sa suholan. Ang dakong problema sa rehiyon siete padayon pang gipangita sa RTWPB7 si super-vening(Toink!).

Mana: Dong Menggoy nakadungog ko sa balita ba wala pa daw umento kay wala pay supervening condition.

Menggoy: Maoy lagi kuno Nay.

Mana: Unsa man nang supervening Dong?

Menggoy: Ambot! pero akong duda ig-agaw ra nang superman(Toink!/Aguy!)

Hehehehehehehehehehehehe!

Ang mga gikinahanglan nga makita aron molutaw si super-vening mao kini:

• HPF - High prices of fuel

• CPI -Consumer price index

• IR-Inflation rate

• DPPP- Declining purchasing power of peso

Pero og nganong hangtod karon ang mga representate pa lang sa mga mamumuo sa RTWPB7 maoy nakakita ni super-vening mao nay giingon “ambot sa langaw pilay edad sa ok-ok”(Toink!/Aguy!)

Sa kahanap sa aksiyon sa RTWPB pagpabor sa umento akong tan-aw nausab ang kahulogan sa gikinahanglang mga indikasyon.

• HPF – Hanap ang Prices of Fuel!(Toink!)

• CPI- Consumer Price Inutil!(Toink!)

• IR – Imahinasyon Ra!(Toink!)

• DPPP- Dakong Posebli Pusoy ang Paumento!(Toink!)

Hehehehehehehehehehehe! Walang personalan!

Apan hinaot makatabang ang pag-awhag sa Presidente sa mga sakop sa RTWPB nga mopahamtang gyud og umento sa suholan.

Bisan pagsipsip na lang sa Presidente ang ilang buhaton ug ipadaplin na lang ang tiyabaw ug panginahanglan sa mga mamumuo nga nag-antos sa walay hunong nga pagsaka sa presyo sa lana nga moepekto sab sa batakang mga palaliton.

Mahimong dunay epekto sa bisan unsang patigayon ang pagpaumento sa suholan. Apan unsa bay epektibong paagi aron pagpalambo sa ekonomiya?

Pagpiit sa mga mamumuo? O ang paghatag og igong gahum sa pagpamalit nga tataw ra sab nga mahibalik ug mapahimuslan sa mga negosyante.

Hinaot sa sunod tigom sa mga makinaadmanon nga sakop sa RTWPB dili sila magpabiling daw langgam nga mayang bongol. (emailad:[email protected].)