Gipangita si Lapulapu sa mga langyaw nga Katsila

Gisublisubli sa matag Abril 27 ang makasaysayanong panghitabo nga panagsangka ni Lapulapu-Magellan niadtong Abril 27, 1521 isip pagpahinumdom dili lang sa mga lumad nga Oponganon kun dili sa tibuok kalibutan ang naangkon nga unang kadaugan dili lang dinhi sa nasud kun dili sa tibuok kalibutan.

Sa pagsubli sa makasaysayanong panghitabo sa isla sa Maktan sa gihapon nagpabilin nga nagtangag ang mga pangutana nga human sa nahitabong gubat sa Maktan nga mikalas daghang kinabuhi nga naglakip na kang Magellan wala gayod masubli usab ang nagtabyog nga pangutana sa panumdoman bahin kang Lapulapu.

Nahimo na lamang nga komedya sa uban nga si Magellan napatay ni Lapulapu sa ilang panag-engkuwentro sa Maktan ug si Lapulapu gipatay usab sa kusiniro.

Mitumaw kining maong kumediya tungod kay wala man gayod matataw sa kasaysayan kun unsay nahitabo ni Lapulapu human sa ilang panag-engkuwentro ni Magellan sa isla sa Maktan.

Hinuon adunay estorya ang pipila ka mga katigulangan nga lumad nga Oponganon kaniadto nga human sa dugoong hitabo sa isla sa Maktan daw wala na usab mahimutang ang mga lumad nga molupyo nga gipangulohan ni Lapulapu.

Kini ang hinungdan nga gihimo ang panagtigom sa mga katigulangan nga magtatambag ni Lapulapu ug ilang gipadayag ang mga kabalaka sa pagbalik sa mga sakop ni Magellan gikan sa Espanya ug himoon ang bangis nga pagpanimalus ngadto kanila.

Tungod sa maong kabalaka nakahukom ang mga magtatambag nga mga katigulangan nga ilang ibutang si Lapulapu sa luwas nga lugar sa pagsiguro nga dili kini malakip sa gipaabot nilang panimalus nga pagahimoon sa langyaw nga mga Katsila.

Misakay sa usa ka bangka si Lapulapu ug Bulakna kuyog sa iyang sakop sa pamilya ug milalin kini ngadto sa laing isla nga gitawag kaniadto og Berhala nga nahimutang duol sa Borneo.

`Giila ug gitamod usab si Lapulapu sa mga molupyo sa maong dapit sanglit gisumpo man niini ang nanghasi nga mga pirata nga nahimong suliran sa maong isla.