Hapit ko mahagbong sa lingkoranan. Pagpahibawo sa wage board sa Central Visayas nga way usbaw sa suholan ning higayona. Labi na dihang niingon si RTWPB 7 Chairperson Gloria Tango nga bisan ang duha ka representante sa labor niangkon nga gamay rang umento sa mga palaliton ug way supervening condition nga motugot sa sayo nga pagsubli sa suholan.
Unsa may nahitabo nilang Atty. Ernesto Carreon sa ALU-TUCP ug Jose Tumongha sa APL? Nakalimot ba nga ang ilang kahugpongan maoy nipasaka og mga petisyon sa usbaw sa suholan? Gibakwi na bang awhag sa ilang kahugpongan sa dinalian nga pagsubli ug pagpausbaw sa P305 nga minimum nga suholan?
* * *
Naglaom kong nasayop lang si Tango sa pagkutlo nilang Carreon ug Tumongha. Apan bisan giunsa namo og paningkamot di makontak ang duha. Pulos way manubag sa ilang telepono. Nisamot ko’g kaluya pagkabasa sa pamahayag ni Tumongha nga, inay mokuwestiyon, nipasabot sa hukom sa RTWPB 7 nga way supervening condition.
Natakdan na ba silang Carreon ug Tumongha sa sakit sa ilang gisundan nga labor sector representatives? Nga sakop na sila sa collegial body ug busa di makiangayon nga ang sentimento ra sa ilang sektor ang paminawon? Ug giabot na sa talaw human gisigaan sa mata sa mas beteranong mga sakop nga nanggungis na sa katungdanan?
* * *
Maayo na lang nga sa kataposan nasakpan ni June Berongan sa DYAB Radyo Patrol si Tumongha. Kinsa nideklarar atol sa Arangkada nga sayop ang pahibawo ni Tango. Matud niya gikuwestiyon nilang Carreon ang mga numero nga gipakita atol sa tigom sa RTWPB 7 niadtong Huwebes:
•Si DTI 7 Director Asteria Caberte igo lang nitaho nga gamay rang umento sa palaliton apan nibiya nga wa manubag og mga pangutana;
•Duha ra ka merkado (Mandaue ug Talisay) ang gisusi sa DA, nga nideklarar dayong gamay rang umento sa mga produkto sa agrikultura; ug
•Sayop ang mga numero nga gipresentar sa secretariat mahitungod sa purchasing power ug inflation rate sa rehiyon.
* * *
Si Tumongha nipasalig nga di niya budhian ang interes sa mga anak sa singot. Nisaad siya nga barugan ang lig-ong mga sukaranan sa ilang petisyon sa dinalian nga umento sa suholan. Ipakita niya sa sunod nga tigom sa RTWPB 7 karong Mayo 10 ang mga dokumento nga ilang nakuha sa National Statistics Office ug ubang mga buhatan.
Nangayo si Tumongha og tabang gikan sa mga konsumidor. Sa pagtabang nila pagsusi sa tinuoray’ng presyo sa mga palaliton. Aron nga itandi sa resulta sa monitoring sa DTI nga kanunay’ng nipahiyos sa mga presyo.
Si Tumongha, ang labing bag-ong sakop sa RTWPB 7, nipasidaan nga kun luokon gihapong labor, mobiya siya sa katungdanan ug mouban sa kampanya pagpabungkag sa regional wage boards.
* * *
Email: leo_lastimosa@abs-cbn.com