Maayong Domingo sa tanan. Laing problema ang atong tubagon karon may kalabutan sa kabtangan sa magtiayon. Ang pangutana may labot sa gitawag og Prenuptial agreement or marriage settlements kon kasabutan sa magtiayon sa wa pa sila magpakasal alang sa ilang mga kabtangan maoy atong tukion.
Dear Atty. Divine,
Maayong adlaw Atty. Divine ug sa tanang suki sa imong column. Usa ko ka widow kay namatay ang akong bana napulo ka tuig na ang nakalabay ug aduna koy tulo ka mga anak nga pulos na professionals ug duna nay ilang kaugalingong mga pamilya. Aduna koy gamay’ng negosyo nga akong giatiman karon ug aduna sab koy mga kabtangan nga among napalit sa dihang buhi pa ang akong bana. Niadtong miaging tuig mibakasyon ko sa among probinsya sa Bohol ug didto naa koy nakaila nga usa ka 50 anyos nga ulitawo ug gusto nga mangasawa nako. Akong gisultian ang akong mga anak niini apan di man sila mosugot nga magminyo ko aning tawhana kay basin kono og kwarta ray giapas ani niya. Wa ko magduda sa kamatinud-anon aning tawhana atty ug gani miingon siya nga andam siyang mopirma og kasabutan nga di siya manghilabot sa akong mga kabtangan ug kwarta. Busa ang akong pangutana atty unsa man nga kasabutan ang akong himoon aron di siya makapanghilabot sa akong mga kabtangan kun magminyo na mi kay basin mao ni makaingon nga magkagubot mi sa akong mga anak? Palihug tambagi ko. Daghang Salamat.— Lorie”
Dear Lorie,
Maayong Domingo kanimo. Basi sa atong Family Code sa Art. 75, ang magtiayon mamahimong magpirmahanay og kasabutan sa dili pa ang ilang kasal nga iyahay sila og kabtangan kun separation of property ug di sila maghilabtanay sa ilang mga kabtangan og mao ni gitawag og prenuptial agreement o marriage settlements. Kining maong kasabutan kinahanglan inyong pirmahan sa dili pa ang inyong kasal ug kinahanglan nga inyong panotaryuhan ang maong kasabutan. Dili kaayo uso sa Pilipinas ang Prenup apan didto sa gawas sa nasud tungod kay naa silay divorce mao ni sagad himoon sa mga manag-uyab nga magminyo. Kun duna moy prenuptial agreement, ang imong bana di makapanghilabot sa imong kabtangan ug ikaw sab di ka makapanghilabot sa iyang kabtangan ug pinaagi niini kalikayan ang kagubot sa imong pamilya ilabi na sa imong mga anak.
Ang maayo nimong buhaton karon kun makigminyo man ugaling gyud ka aning tawhana mao ang pag-adto og abogado ug unya pagpatabang sa pagpahimo og prenuptial agreement aron pirmahan ninyong duha ug dayon inyong panotaryohan. Salamat ug Best Wishes. — Atty. Divine
Ang prenuptial agreement wa kaayo mauso sa Pilipinas tungod kay conservative man gud ta nga nasud. Ang atong pagsabot sa prenuptial agreement nga ang usa way pagsalig sa iyang mamahimong bana o asawa hinungdan nga siya papirmahon daan og kasabutan busa kasagaran sa mga Pinoy nga magminyo di gyud maghimo og prenup ug ang mo-govern sa ilang properties basi sa Family Code mao kining Absolute Community of Property ubos sa Article 88 nga diin ang asawa o bana automatic nga mamahimong co-owners sa kabtangan nga ilang mapalit sa sud sa ilang kaminyuon kon properties acquired during marriage apan aduna sab kini exception ubos sa Article 92 nga makonsiderar nga exclusive property sa asawa o bana. LEGAL CORNER, Atty. Divine Marcial-Flores, c/o Banat News, corner D. Jakosalem and V. Gullas Sts., Brgy. Sto. Niño, 6000 Cebu City or email sa flores_divina@yahoo.com