May mga kolumnista nga nagsige’g saway sa gibuhat sa mga madre sa Saint Theresa’s College. Nila pa, wala kuno makapasaylo sa mga estudyante nga nakalapas sa patakaran sa eskuylahan.
Tayim pa, mga higala ko sa media, klarohon lang nako, ha? Segurado ba mo nga nangayog pasaylo ang naasoy’ng mga tinun-an, diin bisa’g giunsa’g luhodluhod, wala gyud pasayloa sa mga tagdumala? O basig mi-short cut lang sila kay nagtuo nga sila kuwartahan plus duna pa gyu’g ngilngig nga impluwensiya sa politika, hinungdan nga milahos dayo’g dangop sa kore aron ikiha ang mga madre, diin ginamit ang kalantip sa gahom ug salapi, ang tarong balaod sa tunghaan bawgon sa korte hangtod mahiwi?
Kun ang pamilya nga mikiha adunay balaod sa ilang balay, ang eskuylahan naa pud baya. Kun maoy patakaran sa mga ginikanan nga bisa’g nakasala ilang anak, imbis disiplinahon, dapigan hinuon; aw, ilaha sab na!
Pero dili sila angay manghilabot sa unsay nakab-ot nga disciplinary action sa mga madre, sanglit ang tunghaan may kaugalingon mang balaod nga gipasunod. Ang mga administrador baya sa eskuylahan ang giisip nga ikaduhang ginikanan sa mga bata. Busa, dawaton nato ang unsay isilot sa mga madre ngadto sa nakasala nilang mga tinun-an. Kitang parents moutong na lang kun wa magustoi ang sanction nga gipahamtang kay ato bayang gusto nga anha gyud sa STC pa-eskuylaha ang atong anak.
Ang pagpagarpar sa mga kolumnista, kinsa nag-ingon nga wala gyud makapasaylo ang mga madre ngadto sa mga tinun-an, usa ka yawan-ong pasangil nga dili maayong ibungat batok sa malinis nga pangalan sa STC.
Pagkahibalo sa mga madre nga adunay mga di paborabling hulagway nga giplastar sa Facebook, gipanawag gilayon nila ang atensiyon sa maong mga bata. Sulod sa guidance counsellor’s room, gipasabot ang mga estudyante nga ang ilang gibuhat usa ka dakong kalapasan sa mga lagda sa eskuylahan nga gidumala sa istrikta kaayong mga madre.
Dinhi pa lang, nagsugod na ang due process. Dinhi gihatagan sa mga madre og igong higayon ang mga bata pag-explain sa ilang habig nganong nahitabo man kini? Gianalisar sa mga tagdumala ang tibuok situwasyon sa panghitabo una mopakanaog sa ilang hukom. Nga sa ato pa, duna gyud diay due process sulod sa tunghaan. Busa, wala’y giyatakan nga katungod ang mga madre. (Sumpayan pa)