Huwebes Santo na gyod gipaabot nga daghan nang magdagsa nga mga tawo sa mga lugar nga maoy kasagaran dugukon sa mga tawo. Usa na niini ang isla sa Bantayan kay usa kini sa kasagaran nga adtoon sa mga turista tungod sa lahi nga paghandom sa Semana Santa ug ang mga life size nga mga imahen niini nga i-prosisyon, naa usab ang maanindot nga mga beach resort sa lugar. Ang maong mga adlaw mao usab ang gihimong reunion sa ubang mga pamilya nga dugay nang wa magkita gikan sa nagkadaiyang dapit sa nasud o gawas sa nasud. Kini usab ang panahon nga mag-reunion ang batch 92 sa Bantayan Southern Institute nga himuon unya sa Domingo, Abril 8 sa Bantayan cultural center, busa sa akong mga ka-batch kitakits ta ninyo puhon!
BRGY BINALIW, CEBU CITY
“Sir grabe kaayo ang kinubkobay og bas diri sa among lugar padung sa brgy Agsungot pero wa man gyu’y aksyon nga gihimo ang among mga opisyal aning problemaha nga unta illegal man ning gihimo.”
BRGY JAGOBIAO, MANDAUE CITY
“Diha mismo sa may Eversely dapit sir Jun kay naghitak naman intawon ang illegal nga drugas labi na diha sa duha ka sitio nga maoy gihugpaan gyud ani, maayo untang aksyonan na ni sa kapolisan.”
BRGY CANDABONG, ALCANTARA, CEBU
“Diri sa may barangay hall Sir naa gyod ang magtong-its kanunay lain kaayo tan-awon pero among mga tanod ug mga opisyal sa barangay wa gyod makabadlong, daghan na kaayo ang nahitabong kawat tungod aning sugal.”
BRGY POBLACION, SOGOD, CEBU
“Sir kun manakop ang mga polis diri pilion ra man ang mga habalhabal nga dakpon labi na kun opisyal ang moparking dili man dakpon nga unta pulos man nakasupak sa balaod nganong ultimo ra man ang dakpon nila.”
BRGY TABUNOK, TALISAY CITY
“Naanam naman tawon kahurot ang railing namo diri sa daplin sa karsada kada kadlawon makabantay mi nga naay traysikad nga magkarga anang railing kay ipatimbang luoy kaayo ang ubang tawo nga mangagi kay mabwasot intawon.”
BRGY CABANCALAN, MANDAUE CITY
“Naunsa naman ning karsada sa eskwelahan sa Cabancalan II nga gikawtan og para drainage nga lawom kaayo unya open pa gyod ang nakaparat kay wa tiwasa sa contractor, daghan na intawon nadisgrasya nga estudyante ani.”
BRGY APAS, CEBU CITY
“Among panawagan sa among kapitan nga ipaayo intawon ning headlight sa multicab sa barangay kay usa ra ang suga unya suwaw pa gyud kaayo, sila man hinuon ang mosupak sa balaod sa trapiko.”
BRGY MAGUIKAY, MANDAUE CITY
“Nag-aspalto diri sa ubos sa flyover pero ang taas nga maoy gubaon kaayo wa gyud intawon atimana nga daghan na ang nadisgrasya nga motor ug ubang sakyanan ana nga flyover.”
Alang sa inyong mga reklamo text lang sa 09071678643