EL Crimen del Padre Amaro (Teksto: Jn. 13;1-15)

Nahimong kabahin sa akong dvd collections kining salida nga gibituonan ni Gael Garcia Bernal: “El Crimen del Padre Amaro” Ang Krimen ni Padre Amaro. Hinuon gipangita pa nako hangtud karon ang salida nga nag-ulohan og “The Priest” nga gitan-aw namo kaniadto sa dihang First Year Theology pa kami kaniadto. Sugilanon kini sa tawhanong bahin sa pagkapari nga gilangkoban sa mga tawong mga makasasala nga nahimong pari. Hinuon, si Angelo Zigue ang ni-contextualize niini sa dihang gihimo niya ang dula sa entablado: “ANG TULO KA DAGWAY SA PARI.”Ang ilang binuhatan kaniadto o ang binuhatan ni Padre Amaro, dili na bag-ong panghitabo kondili karaan na kini nga mipadayon hangtud karon.Pagmatuod nga ang mga pari tawo ug kay tawo makasasala. Ang uban hisakpan na samtang ang uban wala pa.

Si Jesus nihugas sa mga tiil sa iyang mga tinun-an agig pagpakita og sanglitanan. Gitawag kini ni Maxwell og BASIN LEADERSHIP. Ideal kini nga panlantaw sa pagkapari nga mahimong imatuod mismo diha sa buhat ug dili lang sa pulong. Ang pagkapari dili usa ka fraternity sa mga elitistang mga ministro, kondili kabahin lamang sa kinatibuk-ang bayhon sa katawhan sa Dios nga sama sa mga layko ang nihatag og kahulogan ug bulok sa banay nga ginganlan og simbahan. “Unya padre, dili gyud ka manguyab?” pangutana sa usa ka sacristan. “Dili lang ta mosulti og human samtang tuskig pa ang kaunoran!” pulong pa ni Padre dayong sugod sa Pakompisal.