Abusado nga taxi drayber

Diriyot ko mamatay adtong Lunes sa gabii. Dili unta sakit ang akong mamatyan kun dili tungod sa abusado nga drayber sa taksi nga daw nakapanag-iya og karsada nga mipadagan sa iyang sakyanan.

Paingon na ko nga mipauli sa balay gikan sa trabaho. Daghan kaayo nga mga sakyanan nga angayan unta nga dakpon kay depektoso og mga suga apan wala lang g’yud nako dakpa kay nagdali ko pagpauli.

Namarayeg man gud og ice cream ang kamanghuran nako nga anak mao nga nagdali ko pagpauli. Wala na gani ko makaapil sa operation sa LTO-Task Force Alpha didto sa Lapulapu City kaniadtong higayuna.

Samtang nagdagan ang motorsiklo nga akong gisakyan diha sa Salinas Drive duol sa University of Southern Philippines (USP) paingon sa JY, usa ka taksi nga kusog nga nagdagan mikalit lang pag-overtake sa laing taxi.

Ang maong taksi diri na moagi sa lane nga akong gisubay mao nga midali-dali ko’g likay aron dili maigo. Gilingi nako ang maong taksi ug mibalik ko, dayon wala g’yud nako buwagi sa akong panan-aw ang taksi.

Gigukod nako ang taksi hangtud nga didto na nako maapsi tungod sa TESDA. Ang drayber nga si Richard Pocong, taga dakbayan sa Lapulapu pwerteng nakapangayo’g pasaylo. Ingon lang ba niana kasayon?

Atensyon sa tag-iya sa taksi nga plate number GXF-296 kay wala na nako matan-aw kun unsay ngalan sa taksi. Palihug disiplinaha ang imong abusado nga drayber nga si Richard Pocong.

Kining maong matang sa drayber dili angay nga padad-on og sakyanan. Daw inosente siya sa lagda sa pagmaneho bisan og mohapit na 12 ka tuig siya nga nahimong drayber.

Kamong mga drayber, ayaw g’yud kamo pag-drive gawas anang mga “yellow lanes” nga anaa taliwala sa karsada kay mahimo kamo nga dakpon. Aw gamay ra man hinoon ang multa sa reckless driving, P1,278 ra man.

Maayo unta og human niadtong akong pagdakop ni Pocong sa miaging gabii, makat-on na siya’g leksyon. Kahayag sa suga sa taksi ug imposible ko nga wala siya makakita nga diha ko sa pikas “lane” nga nag-uniporme man gani ko atul sa maong higayon.

* * *

Dili bitaw angay nga tugotan ang mga bag-ong naproklamar nga opisyal sa Compostela nga gipangulohan ni Mayor Joel Quiño nga makakobra og sweldo atul sa panahon nga wala sila magtrabaho.

Tiaw mo, kapin sa P6 ka milyon ka pesos ang magasto paghatag og sweldo sa maong mga opisyal, gikan sa mayor, bise mayor ug mga konsehal. Angay nga kining maong isyu tukion dayon sa Provincial Board. Ang ordinansa gikan sa kalungsoran subject man nga susihon pagbalik sa Provincial Board.

Ang angay unta nga himoon sa maong mga opisyal mao nga mokuha sila og opinyon gikan sa Commission on Audit (COA) o kaha sa Department of Budget and Management (DBM) kun husto ba ang ilang lakang.

Naunsa baya tawon mo uy. Nagdalidali man mo sa maong lakang nga may lain man unta kamo nga panginabuhian. Wala man kaha kamo magsalig sa inyong sweldo pagka opisyal sa lungsod?

Pakauwaw lang mo uy. Naminaw ko sa mga programa sa radyo naputos kamo sa mga pagsaway. Ang maayo ninyo nga gihimo mao ang pag-atiman sa inyong lungsod nga daw menteryo panahon sa gabii nga pwerteng ngit-ngita.