Ang atong pagsaulog sa kamatayon ni Ginoong Jesukristo maoy pagbuhi sa atong panumdoman sa makasaysayanong kaagi ni Ginoong Jesukristo nga giluiban ni Judas pinaagi sa pagbaligya niini ngadto sa mga Hudiyo.
Gipalingkawas ni Piloto si Jesus sa mga sala nga gipasangil kaniya ug nanghunaw siya sa pagtimaan niini hangtod nga iyang gitugyan ngadto sa mga tawo ang paghukom sa kamatayon.
Gipaantos si Jesus pinaagi sa pagpas-an sa Krus ug gipabaklay taliwala sa naglagiting nga kainit sa adlaw didto sa Kalbaryo, gilatus ug gilansang sa Krus.
Ug dihang nagdupa na si Jesus sa Krus ug gipurongpurongan sa maidlot nga tunok, gidugkal ang hubo nga lawas, gitigbas sa nagpangidlap sa kahait nga espada sa mga Hudiyo hangtod nga nabugtoan sa iyang gininhawa. Samtang sa laing bahin si Judas nga nagluib kang Jesus daw wala mahimutang sanglit gihasol man ang iyang tanlag sa iyang gihimo ngadto kang Jesus nga pagluib sa kaayo sa Ginoo ngadto kaniya apan iyang giluiban nga maoy hinungdan nga gisilotan kini sa kamatayon.
Gihasol si Judas sa iyang tanlag nga naghunahuna sa iyang gihimong pagluib ngadto kang Ginoong Hesus hangtod nga nagpakamatay pinaagi sa pagbitik sa pisi sa iyang liog ug patay na kining hikaplagan nga nagbitay sa ibabaw sa dakong punoan sa kahoy.
Samtang atong gisaulog ang Semana Santa niining panahona adunay nakaingon nga ang pagtaral kang Chief Justice Renato Corona ngadto sa impeachment trial sa mga senador nga nagsilbing maghuhukom daw walay kalainan sa pagtaral usab kang Jesus sa atubangan ni Pilato nga nagsilbing maghuhukom.
Nakita ni Pilato nga walay igong kabasehan ang maong mga kasaypanan nga gipasangil kang Jesus sa mga tawo nga maoy hinungdan nga iyang gitugyan ngadto kanila ang pagpakanaug sa tukmang paghukom.
Kun kapamatud-an man ugaling nga si Chief Justice Corona walay sala maisip nato nga siya mao ang Ginoong Jesukristo sa bag-ong panahon nga gihukman sa mga tawo pinaagi sa gihimong pag-survey.
Apan kun kapamatud-an man ugaling kining nakahimo og kasaypanan maisip nato nga si Chief Justice Corona nga mao ang Judas sa bag-ong panahon sanglit nagluib man kini sa katawhan ug labing siguro nga dili usab kini mahimutang sa pagtulisok unya sa iyang tanlag. (Romeo T. Limpangog)