EDITORYAL- Ang lain na usab nga hulga sa North Korea

Gikabalak-an sa Estados Unidos ug uban pang nasud nga kaalyado sa Amerika ang gitakda sa North Korea m ang pagpalupad sa ilang long range rocket karong umaabot nga Abril.

Ang mao kunong rocket patabanan sa iyang atomic warhead aron suwayan sa kumonistang Korea ang ilang abilidad ug kapabilidad sa puwersa sa ilang gipabrika nga bomba atomika.

Gawas sa North Korea, ang Iran nagpadayon gihapon nga dakong hulga sa kalinaw sa tibuok kalibotan sumala sa mga eksperto.

Apan kadaghan na mahitabo kining maong hulga ug walay katumanan busa di kini angay ikaalarma sa katawhan dinhi sa nasud.

Hinuon ang bugtong nasayud sa epekto niini mao ra ang mga batid bahin mga missile.

Usahay ang mga nasud nga tigpaniid maangin sa mga kabalaka nga ipakatap sa mga nasud nga direktamenting apektohan sa hulga sa North Korea sama sa South Korea, Japan ug uban pa.

Apan kun tinuod ba nga lakip na ang Pilipinas ug uban pang nasud sa kalibotan apektohan niini, usa ka butang nga wa nato hisayri.

Kun may problema ang Amerika bahin sa hulga sa North Korea ug Iran nga motugaw sa kalinaw ug kahusay sa mga kasikbit nga mga nasud niini, ang Pilipinas igo lang sa pagpaniid kun unsay sangputanan niining tanan.

Dinhi sa nasud way mga dagkong hulga sa kagubot gawas sa adlaw-adlaw nga pinatyanay sa gitawag nga petty crimes mugna kasagaran sa mga adis-adis.

Di na mapiog sa mga otoridad ang pagdagsang sa drug addict nga maoy silbing bomba atomica nga motugpa sa kadalanan o kaha kabalayan diin matag karon ug unya mopatay, motulis, molugos ug uban pang krimen nga naglaygay sa sosyedad dinhi sa nasud.

Tinuod may madakpan sila usahay, apan ang pagkatap sa illegal drugs bisan asang suok sa nasud karong panahona nagpakita lamang nga lisud na nga mapakgang kining maong bisyo. Di ba?