Bisan layo-layo pa ang eleksiyon, nagka-init ang lana sa politika sa siyudad sa Sugbo, ilabi na tali nilang Mayor Mike Rama ug Kongresista Tomas Osmeña.
Sa south district, nagkaklaro nga ang panag-atbang tali lamang nilang kanhi Kongresista Antonio Cuenco ug kanhi DOTC Undersecretary Totol Batuhan; ug sa north district, wala pay klarong mosakbang kang Kongresista Cutie del Mar.
Ang makalingaw ning eleksiyon nga umaabot mao ang pagka-mayor ug bise mayor sa siyudad sa Sugbo, tungod kay samtang nagkakusog ang paninguha ni Tomas nga mailog og balik ang Cebu City Hall gikan sa nga kamot ni Mike, nagkalig-on usab ang line-up ni Mike.
Kaniadtong midesider si Mike nga mogawas sa nataran sa Bando Osmeña Pundok Kauswagan (BOPK) si Mike, nakakomentaryo si Tomas nga walay mopares ug mokuyog ni Mike. Iya nang gihukman daan ang itlog kun unsay piso niini bisan wala pa mamusa.
Apan sa dihang gi-anunsiyo ni Konsehal Edgardo Labella nga gidawat niya ang hagit nga mopares kang Mike pagka-bise mayor, nakaon ni Tomas ang iyang pamulong kay lig-on lig-on man ang mipares sa kanhi niya tawo nga karon iya nang gikasilagan.
Kun nakahinumdom kamo, gipagawas dayon sa BOPK ang advertisement nga "buy one take one" nga nagpasabot nga kun mobotar ang mga tawo kang Tomas, i-apil nalang usab iyang pares nga si Konsehal Joy Augustus Young.
Migawas nga pamugos ang maong advertisement kay ang department store nga motanyag og buy one take one, nag-baratilyo kini o ba kaha mga old stock na ang gipamaligya. Ayaw lang pud ninyo og sabta nga baratohon kini silang Tomas ug si Joy Young o mga old stock mao nga nag-buy one take one nalang ang BOPK. Tipik kadto sa ilang pakulo kay matud pang Young nga tungod niadtong maong advertisement, nagsugod na og tuki ang mga botante sa buy one take one.
Kun ako hinuoy pasultion, mahimong si Tomas ang maayong paliton, apan dili nako dawaton si Joy Young bisan pakapinan pa og bubot. Si Young usa ka opisyal nga tang-an na sa politika - politika nga paatras tungod sa iyang pagka-obstructionista.
Unsa may obstructionista? Mao kana ang buhat ni Young nga kusog kaayong magbabagbabag og mga proyekto ug programa nga alang unta sa kaayuhan sa mga tawo.
Tan-awa karon nga gisaulog nato ang fire prevention month, hilabihan na kadaghan sa mga sunog nga lisod masumpo sa mga bombero tungod sa kakulang sa pundong i-abag sa kabomberohan kay ilang gibabagan sa konseho. Nagkinahanglan unta sa pag-abag sa lokal nga kagamhanan ang atong fire department, apan maayo pa ang fire station sa Lapulapu kay suportado pa sa pamunoan ni Mayor Paz Radaza, sa siyudad sa Sugbo, pulos lang babag ang atong nadawat gikan sa grupo ni Joy Young.
Sa south district, hayag na nga Cuenco-Batuhan ang away. Usa pa, ang mga botante sa south, nagsugod na og hisgot sa ngalan nilang Sir Tony ug Totol. Tingale, nagsugod na sila og timbangtimbang kinsa nilang Sir Tony ug Totol ang ilang botohan pagka-kongresista sa south district.
Sila usab ni Totol ug Sir Tony nagsugod na usab og pinahiray og isyu. Ning bag-o lang, si Sir Tony gihinganlan ni Totol Ponsyo Pilato sa gipahibalo niini nga giabsuwelto siya sa COA sa P3 milyones nga TNT (Tony N' Tommy) health fund upat ka tuig na ang nakalabay.
Kay matud pa lagi ni Totol nga ang anak ni Sir Tony nga si James ug asawa nga si Ma. Isabel nalambigit man sa maong anomaliya.
Apan si Sir Tony nagkanayon nga wala siya’y responsibilidad sa maong programa tungod kay igo lamang siyang mihatag og pundo niini ngadto sa Vicente Sotto Memorial Medical Center ug adunay doctor-in-charge nga nag-monitor sa releasing niining pundoha. Butang hinuon kini nga wala uyoni ni Totol kay matud niya, imposibleng wala masayod si Sir Tony sa gibuhat sa iyang anak ug umagad niini nga mga empleyado sa TNT Program.
Sugod pa kining tiniradoray og mga isyu. Makapaabot pa gyud kita unya og binaslanay og tira ni Sir Tony ngadtong Totol ug Totol ngadtong Sir Tony karon nga klarong silang duha ang magsakbang pagka-kongresista sa south district.
Alegre pa unta kadto kun misugot pa si Yong Larrazabal nga mosakbang bisan hain nilang kanhi Kongresista Raul del Mar ug Cutie ang modagan. Apan sa akong nahibaw-an, mibalibad na si Yong.
Nindot pa unta kadto kun adunay lig-on lig-on nga mosakbang sa mga del Mar. Si Yong giisip nga nindot nga materyal para kongresista sa north district, ilado na kini nga bana ni Donna Cruz, usa ka batid nga espesyalista sa mata ug usa sa mga anak sa haligi sa Cebu Doctor's Hospitals ug university nga si Potenciano Larrazabal.
Hinuon, layolayo pa ang eleksiyon, basin may kausaban pa ug dawaton ni Yong ang hagit nga mo-ipon sa grupo nilang Mike. O ba kaha, adunay laing lig-ong kandidato batok sa mga del Mar.