Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.
Samtang nagtan-aw ko sa telebisyon sa Impeachment Trial ni Chief Justice Renato
Corona, nakabig ang akong pagtagad sa giluwatan nga mga pahayag sa testigos sa depensa nga si Congressman Toby Tianco sa Navotas. Nakaingon ko sa akong kaugalingon nga ang tuyo ni Tianco nga ipalutaw mao ang paggukod kaniya sa administrasyon ni Aquino pinaagi sa pagpugong sa iyang pork barrel.
Sumala ni Tianco, nagsugod nga giinitan siya sa gobiyerno karon dihang wala siya mopirma sa impeachment batok kang Ombudsman Mercideta Gutierez. Unya, dihang wala siya mopirma sa impeachment batok kang Corona kay wala man siya makabasa, misamot nga gipugngan ang iyang pork barrel.
Kun buot sabton, ang tumong ni Toby mao ang pagkuha sa simpatiya sa publiko nga angay lang siyang mahiubos sa gobiyerno karon. Apan wala siya masayod nga ang mao niyang pagtestigos nakapaduda sa publiko kun tuyo ba niya nga panalipdan si Corona, o ang iyang kaugalingon ba ang iyang himuong humot sa publiko.
Sa maong pagtestigos ni Toby ug sa giluwatan niyang mga pahayag, iyang gilaoman nga mapalutaw niya nga usa ka political nga katuyoan ang pag-impeach ni Corona, nga mao usay tinguha sa mga abogado sa depensa.
Apan dili angay kalimtan sa mga abogado sa depensa nga duha ang naghusay kang Corona, una sa atubangan sa senado ug ang ikaduha sa atubangan sa publiko. Ang publiko aduna usay kaugalingong paghukom, di kay ang senator-judges ra.
Ang pagtestigos ni Toby maoy sukdanan sa iyang political career. Panahon sa eleksyon sa sunod tuig atong masayran kun nakatabang ba kini sa pagpalig-on sa iyang political career o nakapahuyang ba hinuon.