Ang pagsul-ob og pakigol sa misa

Dugay na baya kining bisyoha sa ubang mga babaye nga motambong og misa. Kay bisan di ka mosulod sa simbahan aron mosaksi sa misa, makita man nimo sa dayag ang mosulod ug mogawas sa simbahan .

Sa matag misa may masud-ong ka nga mga babaye nga magsul-ob nianang short nga mubo kaayo nga gitawag og pakigol.

Di baya lalim sa usa ka pari nga magmisa kansang konsentrasyon tua sa angay niyang isulti atubangan sa maminaw sa iyang wali.

Apan sa matag kipat-kipat niya sa iyang mata adto motugpa sa hamis kaayong paa sa mamords nga babaye kinsa magpakigol.

Dako kaayong konsimisyon sa usa ka pari, nganong tintalon sa mga babaye ang mga anaa sa simbahan, way labot sa mga santos nga di maglihok.

Apan ang galamhan sa tawo sama sa pari nga maoy naningkamot nga ikapalanog ang iyang wali ngadto sa katilingban nga baldahon pinaagi sa mga makalingaw kaayong mga lawas ug pamarog sa mga kaliwat ni Eva kansang postura maayo kaayong pagkalalik nga sayon kaayong makaguba sa maayong hunahuna sa mga kaliwat ni Adan.

Maoy hinungdan nga gipalanog na gyud sa usa sa mga miyembro sa CBCP nga di mahimong ipangatarungan sa kababayen-an ang kainit ug kaalimuot sa panahon aron mosul-ob sila og mga biste nga para pang-beach, o pangaligo, night gown, duster o kaha short nga pakigol sa pagtambong nila sa misa.

Mahimong may mga pari nga himuon kining maong talan-awon nga sustansya sa ilang mga mata , apan may mga pari usab nga hilasan ug law-ayan sa maong matang sa pamiste panahon sa misa kay usa kini ka matang sa pagtintal nga makapausab sa dagan sa hunahuna sa normal nga tawo, ilabi na kun wa kay asawa nga kapahimungtan. Di ba?