Dili mahimong kibhangan ang VAT

Gisugyot ni Senador Ralph Recto ang pagkibhang sa dose por ciento nga Value Added Tax o VAT human niya madungog ang panawagan sa nagkalainlaing sektor sa katilingban ilabina gayod sa transportasyon. Ang senador nagkanayon nga lahi na ang kahimtang sa ekonomiya karon kun ikomparar sa panahon diin gipatas-an og duha ka por ciento ang VAT gikan sa diez por ciento hinungdan nga nahimo kini karong dose por ciento.

Gikomparar sa senador ang ekonomiya sa nasud kaniadto sama sa usa ka grabing masakiton nga nanginahanglan na gayod og pait nga tambal aron kini maayo. Mao kini ang hinungdan nganong gipatong gayod ang dose por ciento nga Value Added Tax ilabi na sa produktong petrolyo.

Karon nga miarang-arang na ang masakiton nga ekonomiya angayan ra usab kuno matud pa ni Senador Ralph Recto nga minusan ang kapait sa tambal nga gidapat niini. Kun nakahinumdom pa mo, ang Senador mao ang amahan sa dose por ciento nga VAT ug mao kini ang hinungdan sa iyang kaparotan sa dihang nagpasubli siya pagpapili pagka Senador.

Ang Senador gisilotan sa katawhan sa nahimo niyang kasalanan. Maayo gani kay sa miaging piniliay nakabalik ra sa Senado ang Senador nga si Ralph Recto. Seguro nakaamgo sa nahimo niyang kasalanan sa katawhan, buot na sa Senador nga kibhangan ang VAT nga gipatuman sa kagamhanan tungod sa balaud nga iyang gipangamahanan.

* * *

Apan walay laraw ang Malakanyang nga kibhangan ang gikolekta nga Value Added Tax. Ang sugyot sa Senador gipalingoglingogan lang sa Malakanyang. Rason sa Malakanyang sa iyang pagpalingog-lingog: mawagtangan og pundo ang mga proyekto sa gobyerno ilabi na ang Conditional Cash Transfer Program nga napahimuslan na kuno sa mga kabus.

Ang Malakanyang nanglipat tungod kay ang pundo nga gigamit sa conditional cash transfer program wala kuhaa gikan sa Value Added Tax kun dili gikuha kini sa inutang nga salapi sa Asian Development Bank. Ang Malakanyang nanglipat tungod kay buot lang tagoon niini ang palpak nga koleksyon sa buhis kay sa pagka tinuod, kanunay nga naalkanse ang kagamhanang Noynoy Aquino sa iyang gipuntarya nga koleksyon sa buhis sukad pa kaniadtong tuig 2010.

Ang kagamhanang Noynoy nawagtangan og tag 200 bilyones ka pesos matag tuig tungod sa pagkalipat sa iyang pagpangolekta og buhis. Ang Bureau of Internal Revenue ug ang Bureau of Customs kanunay usab nga alkanse sa ilang target nga koleksyon ug gani sa bulan lang sa Enero ning tuiga naalkanse na og 4 bilyones ka pesos sa ilang target nga koleksyon ang kinatibuk-ang Bureau of Customs. Busa kun mao kini ang dagan sa koleksyon, maingon ta nga ang dose por ciento nga Value Added Tax nga gikolekta ilabi na sa mga produktong petrolyo mao lang ang nakapalutaw sa hapit na malumos nga ekonomiya sa kang Noynoy nga administrasyon.