Sa impeachment trial nga gipatuman sa senado sa nasud ubay-ubay na ang miraliring nga mga opisyal nga nawad-an og posisyon sa gobiyerno, may napriso, ug may nagpakamatay, gumikan kay namatud-ang sad-an sa impeachment.
Ang mga na-impeach sa milabay’ng katuigan way mireklamo nga one-man rule ang pamaagi sa pamunuan ilabi na sa administrasyon ni kanhi Presidente Gloria Arroyo.
Bisan si kanhi Presidente Estrada kinsa mikagulkol sa prisohan pinaagi sa impeachment sa panahon ni kanhi Presidente Arroyo wa moreklamo nga one-man rule ang panggobiyerno kaniadto tungod kay gipa-impeach siya.
Karon nga si CJ Corona maoy na-impeach iyang gipakita sa tibuok kalibotan nga gipadagan na ang nasud sa usa lamang ka tawo nga maoy nagdektar nga gukoron siya ug ang tibuok Supreme Court.
Kini tungod kay alang kang Corona untouchable ang mga maghuhukom sa labaw’ng hukmanan nga di angay kuwestiyonon bisan kun kadudahan na ang ilang lihok kay nasukwahi na sa tukmang panukdanan ug pamalaod sa nasud.
Kay buot bang ipasabot ni Corona nga ang balaod sa nasud mogukod lang batok sa mga tawo nga di sakop sa Korte Suprema.
Ang kaso ba ni Corona, kaso ba usab sa tanang mga sakop sa Supreme Court?
May labot diay ang Supreme Court sa personal nga SALN ug ITR ni Corona?
Kumo lang kay gisuta sa impeachment court ang bahin sa iyang katigayonan kun nakabayad ba siya og hustong buhis niini ug ang kadali niya namilyonaryo human makatungtong og dakong puwesto sa Korte Suprema, gipagarpar na niya nga giinitan sa Malacañang ang Korte Suprema. Naunsa naman kining kalakiha. Di ba?