LP naapiki

Naglabad ang ulo sa kadagkuan sa Liberal Party (LP), labi na ni Department of Transportation and Communications (DOTC) Sec. Mar Roxas, kun unsaon nila pagsulbad ang kasungian nila ni Mayor Mike Rama ug Kong. Tomas Osmeña dinhi sa Cebu City.

Una natong nasayran nga nanuyo si Kong. Tomas sa dihang misuway pagsulbad si Roxas sa maong problema. Buot ni Roxas nga si Mayor Mike maoy magpapili pag-usab tungod sa gitawag og equity of the incumbent rule samtang magpadayon si Kong. Tomas sa pagka-representante sa south district sa siyudad.

Tungod sa maong panagbangi nagsigi na og saway si Kong. Tomas sa LP. Iyang gipasigarbo nga wala siya magkinahanglan sa tabang sa maong partido panahon sa eleksiyon hinunoa ang partido maoy nagkinahanglan kanila sa Bando Osmeña - Pundok Kauswagan (BOPK).

Human niini, daw nahadlok si Sec. Roxas sa linugdangan sa mao nilang away ni Kong. Tomas. Nagkinahanglan man gud ang kalihim sa tabang sa BOPK kay molansar man siya pagka-presidente sa 2016. Agi og ulo-ulo nagpatawag og miting si Department of Interior and Local Goverment (DILG) Sec. Jessie Robredo sa mga sakop sa LP dinhi sa Sugbo diin iyang gipahibawo ang paghatag og pwesto kang Junjun Davide ug Bimbo Fernandez. Wala dapita si Mayor Mike sa maong panagtigum.

Unsa may katarungan nga ang tinuod gayud nga sakop sa LP wa man imbitaha sa maong miting? Nahadlok ba si Roxas nga mosamot ang kalagot kaniya ni Kong. Tomas o' tungod ba kay dagko kaayo og ngisi sila si Mayor Mike ug si Bise Presidente Jejomar Binay sa dihang nagpinirmahay sa memorandum of agreement si Binay ug Gob. Gwen Garcia aron pagsulbad sa problema sa 93-1?

Nagtoo ako nga adunay nag-intriga kang Roxas nga dili mopaluyo ang mayor kaniya kay suod kini kang Binay. Kinahanglan nga timbangtimbangon sa kalihim kining iyang desisyon kay nagkalig-on na ra ba ang reformist group ni Mayor Mike. Sa pagka-tinuod usab, layo na kaayo og biya si Roxas kang Binay kun popularidad ang basihan.

Dinhi nimo makita kun unsa kining LP ubos sa liderato ni Roxas. Naapiki ba ang LP dinhi sa siyudad o si Roxas ra ang gilabdan sa iyang ulo? Mouyon ba si Pres. Aquino niining dakung inhustisya nga gihimo ni Roxas ngadto sa usa ka lunod-patay nga sakop sa LP nga si Mayor Rama?

* * *

Kining pamahayag sa pag-umangkon ug sa madre nga iyaan ni Cristina, asawa ni Renato Corona, maoy moduot sa gi-impeach nga chief justice sa kaalautan.

Mas katuhuan kaayo ang gipanulti nila, labi sa 90 anyos nga madre, nga usa sa mga orihinal nga tag-iya sa Basa-Guidote Enterprise, Inc.- kun giunsa sila paghulga ug sa pag-ilog sa magtiayong Corona sa maong korporasyon.

Apan kining tanan anaa ra sa mga senator-judges. Kun dili gani matagbaw ang kinabag-ang katawhan sa ilang hukom nahadlok ako nga mahitabo na usab ang laing people power.

* * *

Hain na man kadtong gisaad ni Kong. Tomas nga firetruck nga iyang pangayoon gikan sa kalihim sa DILG? Mao ra ba kini ang katarungan ni Konsehal Margot Osmeña nganong wala nila aprobahi kadtong gipangayo ni Mayor Mike nga gahin alang sa pagpamalit og firetrucks ug mga fire-fighting equipment.

Karon nga taudtaud lang adunay sunog, pasagdan ba lang nato nga maugdaw una ang masunog nga kabalayan tungod kay dili na managan ang mga firetrucks tungod sa kagubaon na niini? Kinahanglang patubagon nato ang mga konsehal nga walay laing gihunahuna kun dili mao ang pagdaut sa administrasyon pinaagi sa paglaslas og katunga sa gipangayong gahin ni Mayor Mike.

* * *

Gitawag ni Fil-Am John Lopez ang atensiyon sa mga tinugyanan sa trapiko aron dakpon kining drayber sa mga sakyanan nga dili magsuga ingon man ang dili mo-dim panahon sa kagabhion. Kini maoy usa ka hinungdan sa mga disgrasya sa kadalanan. Nganong wala man kini hatagi og pagtagad sa atong mga traffic enforcers ug police?

* * *

Email:[email protected]