Special Power of attorney

Kanunay na ta nga makadungog aning Special Power of Attorney kon SPA, apan wa ta kasabot kun unsa ning SPA ug kun kanus-a ta magkinahanglan niini. Busa kining pangutana kalabot sa SPA maoy atong tubagon karon pinaagi niining suwat nga gipadala ni Frank L. sa Cebu City.

“Atty. Divine,

Aduna kami sakyanan nga plano namong ibaligya. Wa kaayo koy idea kun unsay mga gikinahanglan nga dokumento sa pagbaligya niini. Apan ang akong problema karon kay kining sakyanan narehistro sa pangan sa akong Papa nga atua karon magtrabaho sa Malaysia busa dili siya makapirma sa Deed of Sale. Ang akong pangutana attorney kun unsaon nako pagbaligya ning sakyanan nga di na magkinahanglan sa pirma sa akong amahan? — Frank L. “

* * *

Frank,

Salamat sa imong pagsuwat sa LEGAL CORNER. Kun ikaw magbaligya og usa ka butang usa gyud sa pangitaon nga dokumento sa mopalit niini mao ang proof of ownership kon mga dokumento nga magpamatuod nga ikaw gyud ang tag-iya sa maong butang. Kun kini sakyanan, una nilang pangitaon mao ang rehistro aron ilang mahibaw-an kun kinsa ang registered owner.

Kun ang imong Papa ang registered owner sa sakyanan mamahimo gihapon kini nimong mabaligya basta aduna kay Special Power of Attorney kon SPA gikan sa imong amahan nga maghatag nimo og katungod sa pagbaligya sa sakyanan ug maghatag nimo og pagtugot sa pagpirma sa Deed of Sale. 

Pagpahimo lang og Special Power of Attorney kon SPA ngadto sa abogado ug ipadala sa imong amahan pinaagi sa email o sa Facebook unya siya nalang ang moprinta niini aron iyang mapirmahan ug iyang panotaryuhan sa Consular Office sa Malaysia ug iyang ipadala og balik nganha nimo ang dokumento nga pirmado ug notarized na ug pinaagi niini mabaligya na nimo ang inyong sakyanan. – Atty. Divine

* * *

Ang SPA magamit sab kun magbaligya ka og yuta, balay ug uban pang kabtangan og kun aduna kay i-process o i-follow-up sa ahensya sa gobiyerno o pribadong kompaniya sama sa insurance unya dili ka personal nga makaadto, mamahimo kang mosugo og laing tawo basta aduna lang kay SPA alang sa imong gisugo. Hinaut nga nahatagan mo og katin-awan ning maong issue labot sa Special Power of Attorney kon SPA.

Alang sa inyong mga pangutana, ipadala lang sa LEGAL CORNER Atty. Divine Marcial-Flores, c/o Banat News, corner D. Jakosalem and V. Gullas Sts., Brgy. Sto. Niño, 6000 Cebu City or email sa [email protected]