Ang cellphone ug computer

Daghan karon ang nakaingon nga dako kaayo og kapuslanan alang kanila ang pagtumaw karon sa mga cellphone ug computer kay dali na man kaayo ang paghibaw-anay sa atong mga higala ug kaparentihan sa bisan asang suok sa kalibutan.

Ang cellphone dali nga kahimanan sa pagpadangat og mensahe ngadto sa imong mga higala ug mga kabanay sa bisan asang suok sa kalibutan pinaagi lang sa pag-text ug sulod sa pipila lang ka sigundos madawat usab dayon ang gipadala nga mensahe ngadto sa imong gipadad-an pinaagi usab sa cellphone niini.

Susama usab niini ang computer nga dili modernong kahimanan nga gihulip sa karaang type writer, magamit usab kini nga kahimanan sa pagpangita sa gitinguha mong makuhang kasayuran ug mahimo usab nga makapadala og mensahe sa bisan asang dapit sa kalibutan pinaagi lang sa pagsulod sa website niini.

Ang bana nga adunay gilakaw ug madugay sa pagpauli sa ilang panimalay dili na magkabuang sa pag-apas ang asawa kay mahimo na man lang teksan o tawgon sa gidala niining cellphone.

Samtang daghan ang nag-ingon nga dako kaayo og kaayohan nga ikahatag ngadto kanila ang paggamit og cellphone apan ang pipila ka mga tawo nakaingon usab nga dili tanang higayon nga makatabang nila ang computer o cellphone.

Matud pa nila nga ang computer mahimo man nga walay kapuslanan sa panahon sa brownout ug makalangan pa gani usahay kay magpaabot pa man sa pagbalik sa power sa kuryente.

 Dugang pa nila nga labaw pa nga ang cellphone nga dili makatabang tungod kay kun adto ka sa mga dapit nga walay signal dili man makontak ug labaw na gayod kun walay reserbang battery ug maabtan sa paglobat nga moresulta pa gani sa panag-away sa magtiayon.