Turno ni Corona
Human sa pipila ka adlaw nga pahuway, ang Senado mobalik karong hapon pag-convene isip impeachment court batok ni Chief Justice Renato Corona ug aron pagsugod na pagdawat sa mga ibidensiya sa depensa.
Apan agi og preparasyon sa iyang depensa gisugdan ni Corona ang gitawag og "mind-conditioning" sa katawhan sama sa gihimo niadto sa mga kongresista sa wala pa magsugod ang trial.
Sa pipila ka adlaw nga paglibutlibot ni Corona sa mga estasyonan sa radyo ug telebisyon iyang buot ganuyon ang huna-huna sa publiko nga ang iyang impeachment tungod ni sa wala niya pagsunod sa kapritso ni Presidente Benigno Aquino III. Sa unang adlaw sa iyang gihimong media blitz matud ni Corona nga ang hinungdan nganong nangisog si Aquino nga mataktak siya sa gahom mao ang disisyon sa Korte Suprema sa kaso nga naglambigit sa pag-apud-apod sa mga luna sa Hacienda Luisita ngadto sa mga saup niini.
Sa misunod nga mga adlaw matud ni Corona nga laing nasuk-an sa presidente kaniya mao ang wala niya pagsuporta sa katukoran sa Truth Commission ug ang pagsupak niya sa hangyo alang sa term-sharing.
Matud ni Corona nga gihangyo siya nga makigbahin sa iyang termino isip chief justice kang senior associate justice Bernardo Carpio.
Si Corona miingon nga iya kining gibalibaran tungod kay supak ni sa Constitution.
Of course, sayud tang tanan nga ang mas labaw'ng hinungdan sa iyang pagbalibad sa term-sharing mao ang iyang kahakog sa gahum.
Pero dili na maoy tinuod nga isyu sa pagkakaron. Dili ta angayang magpalingla niining daghan nga mga isyu nga nitumaw.
Ang isyu nga maoy unod sa Articles of impeachment mao ang kapakyas ni Corona pagdeklarar sa iyang mga kabtangan diha sa iyang statement of assets liabilities and networth kon SALN.
Dili ta angayang malingla sa giingon nga motibo pagpalagpot niya. Bisan unsa pay motibo nga nagpahipi ang panguta nga angayang tubagon ni Corona kun nganong wala niya ideklarar sa iyang SALN ang kapin sa P30 milyones niyang deposito sa PS Bank ug BPI.
Lain niyang angayang ipasabot kun diin gikan ang maong kwarta. Kini unta maoy angayang sentro sa tubag ni Corona sa mga isyu batok niya ug dili ang pagsuway pagpingis sa kontrobersiya ngadto sa motibo ni Aquino.
Samtang tinuod posibling nasuko si Aquino sa disisyon sa korte suprema sa Hacienda Luisita apan dili sab malalis ang kamatuoran sa nagtumpi niya nga kwarta sulod sa bangko nga kadudahan diin gikan.
* * *
- Latest
- Trending
