Nakugang ang mga sakop sa Presidential Security Group dihang mismo si Presidente Benigno Aquino III ang mipahibawo atol sa ilang ika-26 nga anibersaryo sa giingong plano sa kudeta batok sa iyang pamunoan.
Ang kumander sa PSG nga si Col. Ramon Mateo Dizon nakalitan sa pamahayag sa presidente tungod kay wala man gayud sila’y report kabahin niini. Bisan ang Chief of Staff sa Armed Forces of the Philippines nga si Lt. General Jessie Dellosa wala masayod sa gipanulti ni Aquino.
Ambot diin puniti ni Aquino ang maong kasayuran, apan usa ka butang ang tataw dili gikan sa intelligence community sa militar ang impormasyon sa presidente kini tungod kay gihimakak man ni Dellosa ang maong pangangkon.
Ang gihimo sa presidente nagpakita sa iyang kakuwang sa hibangkaagan isip Commander in Chief. Ang ingon niini nga mga kasayuran, labi kun dili gikan sa militar, angayan unta nga iya una nga gipasusi sa wala pa siya magpataka og buka sa iyang baba.
Dili ba dakong insulto niya nga mismong ang mga opisyal sa AFP mihimakak sa iyang pangangkon?
Kun duna may report nga miabot niya sa giingong plano paglumpag sa iyang gobyerno ang angayan niyang gihimo mao ang pagsusi niini sa militar o ba kaha ang pag-awhag nila nga susihon unsa ka tinuod ang maong kasayuran.
Ang nakadaot kay ang nagyawyaw, gawas ni Aquino, nga dunay plano sa kudeta mao man ang mga senador sama ni Antonio Trillanes ug Panfilo Lacson. Kinsa man diay tinubdan sa intelligence report ubos sa administrasyong Aquino ang Senado o ang AFP ug PNP?
Kun wala mahibawo ang militar dili kaha mugna lang sa huna-huna ni Aquino ang maong plano aron lang gyud dunay ikapasangil batok ni kanhi presidente Gloria Macapagal Arroyo?
Hapit nalang hinuon ko motuo sa pasangil nga ang gihimo ni Aquino diha sa Malakanyang mao lang ang pagpunay og pamasangil sa iyang kontra ug pagpanggukod nila aron matabunan ang iyang dakong kakuwangan sa pagdumala sa nasud.
Mangutana ko unsa na bay nahimo ni Aquino alang sa kaayohan sa katawhan human sa dul-an na sa duha ka tuig niya nga pamunoan?
Ang pagkabilanggo ni Arroyo ug pagka-impeach ni Chief Justice Renato Corona dili angayang ipanghambog ni Aquino tungod kay napriso o wala si Arroyo, matangtang o sa dili si Corona wala ni direktang epekto sa panginabuhi sa mga Pilipino.
* * *