Pagtulon-an sa lungsod sa Compostela

Hingpit na nga giproklamar sa ikaduhang higayon nga mananaug si Mayor Elect Joel Quino ug mga kaubanan nga mananaug sa miaging piniliay 2010 sa Commission on Election (Comelec) ug gihimo gilayon ang ikaduha usab nilang higayon nga pagpanumpa sa katungdanan.

Sa maong kalamboan daw naibtan og tunok ang mga molupyo sa maong lungsod tungod kay miasumer na man sa katungdanan ang ilang mga piniling opisyal sa lungsod nga maoy mopadagan sa ilang pangagamhanan nga temporary lamang nga gilingkoran sa opisyal sa Department of Interior and Local Government (DILG) isip officer-in-charge.

Ang nahitabo sa lungsod sa Compostela gitan-aw sa uban nga talagsaong kasinatian kay tiaw moy human sa piniliay nga gipahigayon wala makalingkod ang mga mananaug sa piniliay tungod sa protesta sa kaatbang.

Kini nahitabo tungod sa hilabihan usab kahigpit nga panag-atbang sa grupo ni Quino ug ni kanhi mayor Retchie Wagas nga misangpot sa pagprotesta.

Gumikan niining maong kahimtang daghan ang mga molupyo sa maong lungsod nga nabaraw usab ang pangagamhanang kalihokan sa pagpadayon sa pagdis-og sa unahan alang sa pagkab-ot sa gilaumang kalamboan.

Nagsapaw ang problema sa kabarangayan tungod kay ang mga opisyal nahisama sa barko nga naglawig sa kadagatan nga wala masayri ang pagadulngan tungod kay wala man ang kapitan nga maoy hanas sa pagpanimon.

Ang maong kahimtang sa maong lungsod miresulta kini sa daghan kaayong panginahanglan nga napakyas sa pagtagamtam ang mga molupyo nga naglakip sa guba nga dalan kay kakuwang sa ilang mga sugang dagitab, paghipos sa ilang basura ug uban pa. (Romeo T. Limpangog)