EDITORYAL - Ang taras ni Senador Santiago

Ang pagpanap-ong sa dunggan sa usa ka abogado nga girakrakan ni Senador Santiago og kasaba atol sa impeachment hearing usa lang ka pagpasabot nga gialingug-ngogan ang maong prosecutor sa tingog sa senadora.

Ikaw nga usa ka bana kun ang imong asawa magpunay og rakrak kanimo sa gawas ug sa sulod sa inyong bay , aw di lang tingale igo nga manap-ong ka sa imong dunggan kundi mabadlong pa nimo aron mohilum.

Kun ikaw lingugngogan sa imong asawa nga magpunay og kasaba kanimo , daw unsa pa kaha ang laing tawo nga morakrak kanimo.

Ang   impeachment hearing gisaksihan sa minilyon ka tawo ug ang pagpakauwaw ni Santiago sa mga prosecutor di lalim nga paminawon sa maong mga hingtungdan   ug sa ilang pamilya ug kahigalaan.

Si Santiago kun tungod sa iyang ka-high-blood maoy ihapin niya sa iyang kaisog panahon nga mokomprontasi siya sa mga prosecutor, mas maayo pang di siya motambong sa hearing kay delikado kun atakehon siya sa altapresyon o kun motambong man magpakahilom siya.

Kun ihapin niya ang iyang ka-bright nga abogada, maayo kaayo niyang paminawon sa iyang kaugalingon, apan kun unsa kataas ang iyang tingog ug kaisog mangasaba sa mga tawong tinamod usab sa katilingban ingon usab niana kamubo ang pagtan-aw kaniya sa mga tigpaniid nga may igong kabuot.

Busa alang sa mga pari, angayan lang itambog si Santiago sa impiyerno, nga nagpasabot nga wa usab sila mahimuot sa maong  matang sa kinaiya.

Ambot kaha mao ba gyud   kana ang iyang kinaiya bisan sa sulod sa ilang balay ug ngadto sa mga sakop sa iyang pamilya kun masuko siya.

Sa mga babaye nga tigpaniid , ambot ganahan ba kaha sila sa maong matang sa kinaiya, kay alang sa mga lalaki, ngil-ad kaayo kun ingon niana ang kinaiya sa usa ka asawa nga kusog kaayo mokasaba ug morakrak sa bana. Di ba?