Tungod sa sayong deadline nga gisita sa Commission on Election alang sa pagsumitir sa mga certificate of candidacy sa mga kandidato karong umaabot nga 2013 nga bugnong lugaynon, dili na gyod kapugngan sayo na natong masayran og si kinsa kini sila bisan man tuod og nasayod na ta sa uban nila.
Ang mga nagpaukon-ukon ug nagtago manglugwa na og sayo kay kun wala ko masayop ang deadline sa pagduso sa certificate of candidacy sa mga kandidato karon nang moabot nga Oktobre 5 busa walo na lamang ka buwan ang nahabilin.
Sa dakbayan sa Sugbo klaro na ang battle royal tali nila ni Mayor Mike Rama ug Kongresista Tomas Osmeña sa pagka mayor ug ingon man Konsehal Edgardo Labella ug Bise Mayor Joy Young sa pagka bise mayor.
Sa pagka kongresista sa South District murag upat ang posibling magkombati. Sila si kanhi kongresista Tony Cuenco, konsehal Margot Osmeña, konsehal Bebot Abellanosa ug kanhi DOTC undersecretary Totol Batuhan. Samtang ang sa North District magkombati sa pagka kongresista sila si kanhi kongresista Raul Del Mar ug kanhi konsehal Maning Legaspi kana kun wala masayop sa iyang nahipos nga kasayoran ang akong higalang duwende.
Sa dakbayan sa Mandaue walay challenge kay naghiusa na ang mga Cortes ug mga Ouano samtang ang sa Lalawigan sa Sugbo klaro na ang engkuwentro tali nila ni kanhi konsehal Junjun Davide ug bise gobernadora Agnes Magpale kinsa gipaluyohan sa mga Durano. Posibling si Magpale usab ang i-indorso ni Gobernadora Gwen Garcia.
Sila si kanhi bokal Juan Bolo ug Weng Gakit nagpabantang na usab para sa ilang pagbalik diha sa Kapitolyo.
Pila pa lang ni sila sa atong nahibaw-an nga magpapili sa moabot nga bugnong lugaynon sunod tuig. Bisan og layo pa ang bugnong lugaynon nagpahibalo na silang daan sa pagtoo nga sa pag-abot sa adlaw sa piniliay dili malimtan ang ilang pangalan.