Sa pagbukal sa kaldero sa politika

Sa pagbukal sa kaldero sa politika maoy masinati sa kabarangayan ang lainlaing pundok sa mga politiko nga mosuroy ug makiglamano sa pagpakita sa tanan nilang mga kaayo ug pagkamatinagdanon ngadto sa mga kabus nga mga molupyo.

Ang pipila kanila nga mosuroy motanyag kunohay og pagadamhang serbisyo, o magpasiugda og mga kalingawan o maoy moabaga sa balayranan sama sa pasiugdahang variety show ug uban pa sa matag higayon nga adunay sitio o barangay nga magsaulog sa ilang tinuig nga piyesta.

Sa mga paugnat sa kusog nga pasiugdahan sama sa baskeball kay adunay gipasiugdahang liga daw mabaw kaayo ang mga bulsa sa maong mga politiko kun hangyuon kini nga maoy mobayad sa uniporme sa mga players ubos sa kondisyon nga malakip sa pag-imprinta ang mga pangalan niini.

Makaayo kini sa mga molupyo kay ang mga grupo nga magkaatbang sa umaabot nga piniliay magpalabwanay man sa ilang kaayo ug sa mga hangyo nga serbisyo dali kaayong motubag ug kun mahimo ihatod pa sa tugkaran sa mga molupyo sa kabarangayan.

Kining maong matang sa serbisyo dili kini malungtaron kay dili man pinasubay sa dugokan sa makanunayong pagpangalagad may politika man o wala naandan na gayod nga gihimo. 

Adunay naghimo niini nga nagpakaaron-ingnon lamang sanglit dili man kini sinsiro kay ang labing tinuod ang paghimo sa ingon supak man sa ilang kabubut-on ug kun mapilde sa piniliay nga pagahimuon dakong posibilidad nga mosangko kini sa pagpamoyboy. 

Ang labing pait nga palandungon kun ang maong grupo sa mga politiko nga nagplano sa pag-itsa sa kawo sa politika sa umaabot nga piniliay kon mosamblig na og lapok batok sa mahimo niining kaatbang nga ang tumong mao ang pagguba lamang sa imahen.

Maangin na hinuon ang ilang mga dumadapig sa matag habig nga moresulta sa panagbungol sa managsuon ug managsilingan kon managkalahing   grupo sa mga politiko ilang gilabanan ug moresulta pa gani sa kaguliyang.