ASH

Niadtong Miyerkules sa Badlis nahimong sentro ang abo sa iningles pa ASH. Ang ASH nagkahulogan og Availability, Sincerity ug Humility. Available diha sa paghimo og maayo ngadto sa uban. Dili lang diha sa corporal works of mercy kun dili diha pud sa paghimo sa kaugalingong panahon ingon nga gasa ngadto sa uban. Sincerity diha sa pagpakita og konkretong timailhan sa paghinulsol diha sa paghimo sa kinabuhi ingon nga konkretong resolusyon sa usa ka mahinulsolong kinabuhi. Humility diha sa pag-angkon sa imong kaugalingong kakabus atubangan sa Dios ug sa imong isigkaingon. Kay bugtong mapaubsanon lamang ang makasinati sa makaalim nga bunga sa pagpasaylo. Ang abo timailhan usab sa kagikan ingon man sa paulian sa tawo. Nga tungod niini ang bisan unsang tawo ang wala’y igong gahom nga hakgumon ang kaseguroan mahitungod sa kaugalingon. Sa abog kita gikan ug sa abog kita pauli. Wala’y mobato sa kalibutan, ang tanan dunay kinutoban.

Sa laing bahin, ang abo nipahinumdom kanato nga angayan natong tilokon ang limitadong panahon sa atong kinabuhi diha sa paghunahuna sa mga tawong nahimong nalambigit sa atong kinabuhi bisan pa man sa mga higayon nga “sakit” lamang ang ilang gihatag nganha kanimo. Ang panahon sa kuwaresma panahon sa paghunong ug paglingi-lingi sa palibot ug pagsud-ong sa kaugalingon mismo. Apan alang kanako, mahinungdanon kaayo ang paghunong aron akong hinumdoman ang akong inspirasyon nga maoy nakaaghat kanako aron mamahimong mamugnaon sa tanang pagabuhaton. Tingali imposible ug hangos kaayo ang paggambalay og mga laraw alang sa kalambuan. Apan ingon ana ang kinabuhi, kulbahinam.