CEBU, Philippines - Ang lakang ni CJ Renato Corona sa pagpahunong sa kasong impeachment nga gipasaka batok kaniya ug sa di pagsugot nga mabutyag atubangan sa publiko ang iyang kuwarta nga anaa sa mga bangko, labi hinuong nagpabug-at sa pagduda sa publiko nga lubog ug di tin-aw o di transparent ang pangalagad niya sa goberno.
Ang balaod nga gitawag nga foreign currency law nga nagdili sa taga bangko sa pagbutyag ngadto sa publiko sa tinagoang kuwarta sa usa ka tawo maayo man kun ang mangita niini tulisan kinsa gusto lang masayud kun unsa ka kadaghan og sapi aron ilang matulis. Apan kun ang mangita publiko na, aron pagsuta kun ang imong hinipusang kuwarta mahitakdo ba sa kinitaan sa imong panarbaho ug gibutyag ba nimo sa imong ITR pagsuta kun mibayad ka ba og buhis niini sa goberno, di man tingale angay nimong ilimod ang kamatuoran. Kay ang imong pagtago niini nagpasabot nga tataw kaayo nga wa nimo kana ibutyag sa imong ITR busa wa ka mobayad og buhis niana. Unya tinarong diay na, buot bang ipasabot nga dinhi sa atong nasud ang mga makililimos lang ug ordinaryong magbubuhis maoy pugson sa pagpabayad og buhis ngadto sa goberno samtang ang mga kuwartahan exempted tungod lang sa balaod sa bangko?
Kun mao ning kalakiha nindot na diay kaayo og taming ang mga milyonaryo o bilyonaryong opisyal sa goberno o kaha bilyonaryong negosyante nga aron di maibanan sa buhis ang ilang katigayonan pahiposan kini sa bangko tungod sa balaod nga magprotiher kanila gikan sa pagbutyag sa tinuod nilang depositong kuwarta.
Nagpasabot ba kini nga kakonsabo diay ang taga bangko sa mga tawong adunahan aron di kini makabayad og tukmang buhis ngadto sa goberno nga kun imong sumadahon usa ka pagpangawat? Busa ang paghangyo ni Corona nga patak-opan na ang kasong impeachment batok kaniya ug ang pagmando sa impeachment court nga di na ipakulitog ang iyang kuwarta sa bangko di hapin aron malimpyo ang iyang ngalan atubangan sa publiko.
Kun di maklaro ug matin-aw ang ngalan ni Corona pinaagi sa pagsuta kun nagtarong ba siya sa pagtug-an sa iyang kinitaan sa iyang ITR ug pagbutyag sa iyang kabtangan sa iyang SALN, may transparency ba ang iyang pangalagad sa goberno? Di ba?