EDITORYAL - Ang demolition nga gilusad ni Sesbreño

Ang pagpuypoy sa nag-alintabong kainit sa dinumtanay tali ni Manlalaban Raul Sesbreño ug sa nagpuyo sa iyang yuta   nagkinahanglan sa pagpalihok sa ilang tagsa-tagsa ka kalag   aron mapugngan ang dugang pang pagbanaw sa dugo bunga sa maong kasungian. Ang kalag sa tawo gilangkoban sa paminsar sa utok ug   sugyot sa kasingkasing.

Buot ipasabot nga kun ang inisog nga mandar sa utok   santaon   sa mapailubong sugyot sa kasingkasing, way umoy ang kamot sa pagbuhat og sala. Sa bahin sa pamilyang Sesbreño way laing anaa sa utok niini kundili mao ang pagpangita sa hustisya , nga kumo kay ilang katungod ang pagpapahawa sa namuyo sa ilang yuta kinahanglang mopahawa sila sa malinawong paagi.

Apan nahitabo nga walay gusto sa pagpahawa ang mga hingtungdan ug ang maong mandar sa ilang utok giduyogan usab sa ilang kasingkasing, busa layo ra kaayo ang kasulbaran nga malinawon sa ilang kasungian.

Misangpot ang tanan sa pagkaangin na sa kinabuhi nga unta di angayang mahitabo kun ang matag kalag sa tag-iya sa yuta ug sa mga namuyo niini pulos pa nagkasinabtanay.

Kumo kay kalag man ang kinahanglang palihukon niining maong bangi, way laing gikinahanglan kundi ang pagpatigbabaw sa malumong hiyas sa kasingkasing nga angay sabton sa utok.

Ang utok sa tawo usahay maoy magpaalintabo sa kasuko ug kaisog niini nga mopabakyaw sa kamot aron sa pagbuhat og sala.

Samtang ang papel sa kasingkasing mao ang pagpatigbabaw sa pagpailob inubanan sa kalumo.

Sa panahong pangulitawhan sa kasingkasing ang utok unya mopatuo ang naulahi, anha diha mopatigbabaw ang pailob, pagpaubos ug pagputol sa garbo aron pagkab-ot sa labing malipayong desisyon sa tawo nga maoy makapa-way umoy sa kamot sa pagbuhat og sala. Dinhi kun ang kalag sa pamilyang Sesbreño makigsinabtanay sa mga kalag sa namuyo sa ilang yuta, may dako bayang kalagmitan nga di na madugangan ang pagbanaw sa dugo gumikan sa maong kasungian. Di ba?