Tibuok kalibutan misaksi sa Sinulog!

Gumikan sa mga bag-ong teknolohiya, ang Sinulog 2012 nasaksihan sa nagkalainlaing dapit sa kalibutan. Ang Sinulog sa Sugbo giisip nga labing daku sa tibuok nasud, the grandest festival in the Philippines. Matag tuig, minilyon ang manganhi sa Sugbo aron pagsaksi sa Sinulog, and of course, pag-Pit Senyor, kay kun walay Pit Senyor, walay Sinulog.

Kun walay mga tindera sa kandila nga magsayawsayaw atbang sa Basilica, dili unta makahunahuna si Boy Odilao pagmugna sa Sinulog.

Gumikan sa LTE (Long Term Evolution) network sa Smart, ug sa SunoStar Publishing Inc., ang Sinulog 2012 maoy nahimong unang festival dinhi sa Pilipinas nga na-broadcast live via on line, diin ang mga Sugbuanon nagkatagkatag sa nagkalainlaing dapit sa kalibutan, nakasaksi. Matud nila, mora sad kono og dinhi sila sa Sugbo.

Gibanabana nga mga 64,000 ang nakasaksi sa Sinulog on line, kasagaran gikan sa gawas sa nasud. Nindot no? Ang Sinulog ra may ilang gihisgutan dinhi. Sa sunod, maayo sad tingali nga iapil ang Fluvial Parade, ang Religious Procession, ug ang Pontifical Mass sa Kahulogan.

* * *

Wala pa gyud maulii ang ekonomiya sa Amerika. Daghan na kaayong mga dagkung kompaniya ang nanira, gumikan sa kalisud sa panahon. Sa atong nasayran, ang labing uwahi nga mi-file og bankruptcy mao ang Eastman Kodak Co. nga maoy nag-imbento sa hand-held nga camera.

Ang Kodak nga kapin na sa 130 ka tuig nga mi-exist, maoy pioneer kun maghisgot tag photographic film, nag-employ og kapin sa 60,000 ka empleyado panahon sa pagkusog sa ilang negosyo.

Ang market value sa Kodak, sa miaging 15 ka tuig, miabot og $31 billion, mitidlom kini ngadto sa $150 million na lang. Nganong naingon man sila niini?

Lisud na gyud kaayo ang panahon karon. Kun nagsangkiig ang America, unsa na kaha ang ubang mga nasud?   Lagmit ang China ray hayahay karon. Ug wa kaayo ta ipektoho sa kalisud tungod kay dugay na tang nagkalisudlisod, ug mao na kini ang atong naandan. Mao man gani hinungdan nga ang mga langyaw, matingala ngano nga sa atong kakabus ug kalisud, malipayon ang Pinoy. Ikatawa lang ang kagutom ug ubang mga problema.