Ebidensiya batok teknikalidad

Ikaduha na rong semana sukad magsugod ang impeachment trial batok ni Chief Justice Renato Corona apan way kausaban ang labok sa mga sakop sa House prosecution panel. Kanunay lang silang gilupig sa lantugi sa mga sakop sa depensa pinangulohan sa beterano ug maayong laking abogado nga si retired justice Serafin Cuevas.

Segun sa mga nitumaw na nga mga kasayuran sulod sa pipila ka adlaw nga hearing ato na nga maaninaw nga duna silay lig-on nga ebidensiya pagmatuod sa posibling pagpahimulos ni Corona sa pwesto ug pagpangurakot.

Apan ang problema kay pagarpar ra gyuy ilang hibangkaagan ug dili na kadepensa sa ilang baruganan ug argumento didto sa Senado. Kun imong pamation ang lead prosecutor nga si Niel Tupas Jr. labihan nilang ngilngiga. Apan didto sa senado ultimo sa pagpasabot unsay tumong sa pagpresentar nila sa testigo dili gani makamao hinungdan nga matag higayon nga babagan sa depensa maglisud na sila sa pagpatingog sa ilang testigo.

Maoy kanunay gipunting sa depensa ang technicality nga posibling sayon ra untang depensahan kun nagtuon pa sila og husto. Kun buot huna-hunaon mas dako og bentaha ang prosecution panel sa usa ka impeachment trial tungod kay mas lugak ang lagda niini pagdawat sa mga ebidensiya.

Sukwahi sa ordinaryong husay sa mga kasong criminal diha sa korte nga istrikto gisubay ug gitamod ang rules of court didto sa Senado duna silay kaugalingong lagda ug “suppletory “ lang rules of court.

Ang rason niini mao nga ang impeachment trial dili usa ka criminal nga proseso diin ang sinumbong mamahimong masilutan sa pagkabilanggo kun makonbikto. Sa impeachment trial kun si Corona makonbikto ang silot nga iyang maangkon mao lang ang pagkatangtang sa pwesto.

Kini maoy hinungdan nga angayang mas liberal ang Senado pagdawat sa mga ebidensiya. Apan tungod kay dili kamao makiglantugi ang mga sakop sa prosecution mapugos ang presiding officer sa pagpabor sa mga pagsupak sa depensa basi sa technicality.

Usa sa pruweba nga lugak ang lagda sa Senado pagdawat og mga ebidensiya mao ang pagtugot niini nga mapresentar si Commissioner Kim Jacinto Henares sa Bureau of Internal Revenue niadtong miaging adlaw.

Kun buot huna-hunaon mahulagway baya gyud nga immaterial ang pagpresentar niya tungod kay ang unod sa Article 2 sa Impeachment complaint mao man ang pasangil sa non-disclosure sa Statement of Assets Liabilities and Networth ni Corona.

Unsa may labot sa BIR sa SALN, apan tungod kay mas liberal lagi ang lagda sa pagdawat og testigo ug ebidensiya sa impeachment court mao nga gitugot nga makalingkod sa witness stand si Henares. Apan kuwang lang gyud sa abilidad ang mga prosecutors mao nga naglisod sila og patingog ni Henares.

Kun wala pa si Senador Ralph Recto dili gyud ta masayod nga ang income diay ni Corona sulod sa usa ka tuig anaa ra sa kapin sa P400 mil ngadto sa P600 mil apan nakapalit siya og minilyon nga kantidad sa mga kabtangan lakip na sa mga condominium units.

Tungod sa kaminus og abilidad sa mga prosecutors nga nagpaalig-alig sa tahas nakompromiso hinuon ang Senado nga inay ipakita nga wa silay gidapigan isip mga hurado napugos hinuon sila pagsawo sa trabaho nga angayan unta iya sa mga prosecutors aron lang pasayran sa katawhan ang tinuod.

[email protected]