EDITORYAL - Unsa kahay laing estratehiya sa kawatan

Huyhoy na ang abaga karon sa mga miyembro sa acetylene gang human madiskobrehe ang epektibong paagi pagbaraw sa ilang kabuang.

Baniog ang maong grupo sa tibuok nasud ug ubay-ubay na ang nabiktima nila.

Gumikan kay ila gyung gastohan og kuwarta uban sa kahago ang dinagko nilang operasyon, naglisud ang mga otoridad sa pagpakgang sa maong grupo.

Apan dinhi sa Cebu City matilawi nila ang pagkabaraw sa ilang modus.

Busa tungod sa ka-epektibo sa panagang sa pawnshop nga nagbaraw kanila sa unang higayon, angayan nang kopyahon sa tanang mga prendahan ug ubang mga balay patigayon nga lungkabonon ang maong sistema. Kun ang tanan mosagop na sa maong panagang, aw wa nay molingi nga acetylene gang sa maong mga establisamento.

Apan mao lagi, nga kumo ang ilang panginabuhi mao man ang pagpangawat, mahimong di na sila mogamit sa acetylene sukad karon.

Apan ang tradisyonal nga paagi sama sa pagpanulis ug uban pang paagi sa pagpangiriw maoy ilang buhaton samtang magplano na usab og laing paagi sa pag-atake sa mga prendahanan.

Hinuon kun kaantigo ang mga kawatan ug tulisan mohimo og plano aron sila makakuwarta, nagtuo ang  kadaghanan nga mas labaw pa og abilidad ang mga kapolisan   kanila.

Di abilidad sa pagpangawat ug pagpanulis kundi abilidad sa pagsanta sa bisan unsang estratehiya nga sagupon sa maong matang kriminal.

Apan di lamang kay ang kapolisan maoy mangandam batok sa mga kawatan ug tulisan, kundi mismo ang mga negosyante kansang kinabuhi ug negosyo maoy gitun-an pag-ayo sa mga tulisan ug kawatan unsaon nila pagkuha. Di ba?