Ang trabaho ingon nga usa ka tawag

Daghan kanato ang mangita og trabaho gumikan sa tinguha nga mabuhi ug makakuwarta. Apan subo palandungon nga dunay mga trabaho nga wala makahatag sa gitawag nato og personal nga katagbawan. Kay ang trabaho, dili lang trabaho kun dili usa usab ka tawag. Sa maong tawag, nasinati sa tawo ang gitawag nato og personal nga katagbawan ug kalipay bisan pa man kun tingali dili kaayo dako ang suweldo. Kun ang usa ka tawo mamahimong malipayon sa iyang trabaho nan, mamahimo siyang produktibo dili lang sa gipaabot gikan kaniya kun dili diha sa iyang kaugalingon usab.

Sa imong pagpili sa imong trabaho ug kabuhian karon hunahunaa daan kining mosunod:

A.) Ang kuwarta lang ba ang nagtukmod kanako aron akong sudlan kining matang sa trabaho?

B.) Kini ba ang hulhog sa akong tinguha ug kasingkasing?

C.) Nagmalipayon ug natagbaw ba ako niini?

Kun wala ka matagbaw ni magmalipayon sa imong trabaho karon. Ayaw pabilin diha sanglit, basin kini maoy hinungdan sa imong kalaglagan. Kun unsay hulhog sa imong kasingkasing ug hunahuna sunda kini. Ayaw himoang bilangguon ka sa ubang mga tawo. Gikinahanglang higugmaon mo ang imong trabaho.