Si Minda, 49 ang pangidaron, usa ka single mother. Sukad siya nanganak sa babaye niyang anak, siya ra gyud ang nagpadako ug nagpa-eskuyla niini. Gibiyaan siya sa iyang bana, usa ka tuig pa ang panuigon sa iyang anak.
* * *
Wala gayud siya namana pag-usab. Wa gayud siya patintal sa mga lalaki nga buot mangasawa kaniya. “Husto nang kausa ra tang tuntohon og lalaki,” matud niya.
* * *
Niabli si Minda og sari-sari store ug sa kalooy sa Diyos nagmalampuson kini. Duna naman gani kini’g sanga kon branch sa Mandaue. Sa dakbayan de Sugbo siya nagbasi.
* * *
Ang iyang bugtong anak nga babaye usa na karon ka CPA ug nagtrabaho sa dakong banko diin dako usab ang iyang suweldo. Ang inahan ug anak nakapatukod na og komportabling panimalay sa usa ka barangay ning atong dakbayan.
* * *
Nagpadayon ang negosyo ni Minda nga sari-sari store ug nagplano na ron siya sa pag-abli og ikaduhang branch kon sanga sa Lapulapu.
* * *
Walay plano ang anak ni Minda nga magminyo bisan husto na sa pangidaron. Naleksiyon kuno siya sa nahitabo sa iyang Mama kinsa gibiyaan sa iyang amahan.
* * *
Adtong miaging Pasko nagpada kuno og feeler ang iyang bana nga ganahan makig-uli kaniya ni Minda. “Abi kay nagkagidlay naman siya gusto na siya makig-uli human sa daghan nang tinuig nga iya kaming pinasagdan sa among anak,” matud ni Minda ngadto sa usa ka paryente sa iyang bana.
* * *
TRIVIA -- Malipayong Bag-ong Tuig ug Pit Senyor sa atong mga higala diha sa may paradahan sa Lapulapu City. Salamat sa inyong walay hunong nga suporta. (with JVJ)