Niining buwana duha ka mga dagkong relihiyosong kalihokan ang atong masaksihan, una, ang kapistahan sa itom nga Nazareno didto sa Quiapo sa kaulohan nga gisaulog kagahapong adlawa ug ang ikaduha mao ang kapistahan ni Señor Santo Niño dinhi sa Sugbo nga pagasaulogon karong Domingo puhon.
Ang kapistahan sa itom nga Nazareno ug ni Señor Santo Niño kanunay kining gidugok sa minilyon ka mga debotos hinungdan nga todo bantay ang kapolisan. Dinhi sa Sugbo ang kadagkoan sa kapolisan mopakatap og 20 mil ka mga police ug mga kaabag niini alang sa pagbantay sa kahapsay ug kalinaw sa Sinulog ug fiesta señor. Gawas sa mga personnel, gipatuman usab sugod kaniadtong Enero 6 ang total gun ban dinhi sa Sugbo.
Apan bisan pa man sa hugot nga pagbantay sa atong kapolisan mosuway gyod gihapon sa paglighot ang mga dautang elemento sa atong katilingban. Gani sa bisperas sa kapistahan sa itom nga Nazareno, si Pangulong Noynoy Aquino mismo ang nagpahibalo nga ang kalinaw sa kapistahan gihulga kini sa mga terorista. Samtang gisuwayan usab sa mga badlungon ang kaabtik sa atong kapolisan dinhi sa Sugbo. Kaniadtong Sabado human ipatuman ang total gun ban, usa ka habal-habal driver ang gitulis ug gipusil ug dayon gisundan kini sa pinusilay sa may Barangay Camputhaw.
Hinaut nga giniyahan sa milagrosong bata wala untay dautang mahitabo sa atong pagsaulog sa iyang kapistahan ug Sinulog.
* * *
Ako diay nga pahalipayan ang akong higala nga si Jose Franklin N. Camingue, COO III sa iyang pagka designate isip officer in charge sa Piers and Inspection Division sa Port of Cebu sugod kaniadtong Disyembre 20 sa miaging tuig.
Si higalang Franklin nagserbisyo na sa Bureau of Customs sulod sa 32 ka tuig ug nagsugod isip Custom police. Pagka 1992 nahimo siyang hepe sa Export Division sa Mactan Export Processing Zone ug dayon nahimong examiner sa Subport of Mactan. Kaniadtong Septembre 2002 nahimo siyang hepe sa Integrated Cargo Control Section sa Port Operation Division.
Sa kadaghang kontrobersiya sa Bureau of Customs si higalang Franklin wala gyod malambigit niini busa ako manghinaot nga mahimo nang permanente ang iyang bag-ong katungdanan nga gihuptan karon. Sa akong higala ug suki nga tigpaminawan sa akong programa sa Super Radyo Congratulations.