Ang imong kaakuhan

Diha sa Bibliya ang usa sa mga gitahod ug gidayeg nako nga personahe mao si Juan Magbubunyag. Si Juan Magbubunyag pagkasayod niya sa iyang kaakuhan ug tawag ang wala gyud magpagarpar nga siya mao ang Mesiyas o ang dinihogan bisan pa man kun sa tinuoray iya kadtong mahimo. Nagpabilin siyang mapaubsanon. Nagpabilin siyang tataw sa iyang kaakuhan ingon nga precursor.

Sa atong kinabuhi, kadaghanan kanato ang nabug-atan. Ang mga hinungdan mahimong pinugos o dili ba kaha tinuyoan. Ang mga pinugos nga kaakuhan mahimong ipahamtang sa mga giisip natong mga significant others ngari kanato bisan pa man kun estriktohon, ang maong kaakuhan dili gyud unta atoa apan gipugos lang gyud ta sa pagbuhat niini. Ang uban tinuyoan. Bisan kita nasayod nga ang maong kaakuhan dili atoa apan atong gibakyaw ang atong mga kamot aron atong akohon ang dili gyud unta atoa. Ang resulta; pwerting lisora, pwerting paita.

Dili dautan ang mamahimong matinabangon ug gani, kini man ang sanglitanan nga gipakita sa atong Ginoo mismo. Apan angay pud unta natong amgohon nga ang kinabuhi ug matag gutlo dunay limitasyon. Maantigo pud unta kitang mobalibad sa mga hangyo nga dili na kaya sa atong lawas ug panudlanan. Ako kining gipaambit sanglit, ingon ini man ang akong kasinatian. Ingon sila nga hayahay kuno ang pari apan sa tinuod lisud gyud kaayo labina kun daghan ang magpunay og hangyo ug maglisud ka og balibad kay lagi, kabahin man sa imong buhat. Usa sa mga nakat-onan nako pag-adto nako sa General Santos City mao: “Iklaro ang sabot sa nagdapit kanimo!” Kay kun ikaw nahimong manggihatagon sa imong puntil ug panahon dili ka makapaabot nga sila pud ang mobuhat sa ingon. Tinuod libre ra ang tubig. Apan hibaw-i nga gikinahanglan nimong mobayad sa tubero...busa karon, gikinahanglan ko nang mobalibad labina sa mga trabaho nga dili na sakop sa akong kapasidad. Sugod karong tuiga hangtud na sa umaabot.