Batobalani sa Gugma

Dunay parte sa nobena sa Sto. Niño diha sa Pilgrim Center diin daghang debotos ang motu ang luha inig-mass singing sa “Batobalani sa Gugma.”

* * *

Makatandog sa kasing-kasing ang maong kanta ilabi na kun ikaw usa ka believer ug sinserong deboto ni Sr. Sto. Niño.

* * *

Matud pa sa atong higala nga si Leonardo “Daido” Angel, “wa’y normal nga Cebuano ang dili matandog sa maong kanta.” Iya kining gitawag nga signature song sa Senyor.

* * *

Usa ako ka deboto ni Sr. Sto. Niño ug, sa tinuod lang, molumaw-lumaw ang luha ko inigkadungog sa maong kanta. Gani nipalit gayud ako og cassette tape sa maong awit ug ako kining patukaron human nako pangadye ngadto sa Senyor.

* * *

Kining “Batobalani sa Gugma” patukaron na karon sa mga Sugbuanon didto sa Amerika atol sa kapistahan ni Sr. Sto. Niño nga ila usab nga saulogon matag tuig dungan sa atong pagsaulog sa Pista Senyor dinhi sa Sugbo.

* * *

TRIVIA -- Pit Senyor sa tanang debotos ni Sr. Sto. Niño. Pit Senyor sa atong mga magbabasa. Daghang salamat sa inyong pagsuporta sa Banat News. (With JVJ)