Mag-Sinulog na pod ta. Tapus sa Pasko ug Bag-ong Tuig, padayon ang selebrasyon, padayon ang kalipay, padayon ang kaalegre sa atong siyudad. Taastaas gyud ang paglipay. Unya, lingaw kaayo ang media. Mumantala dayon nga magsugod na ang siyam ka adlaw nga mass-novena, as if dunay novena nga duha o lima ka adlaw. Sa akong nasayran, ang pulong novena gikan sa pinulongang Latin, nagkahulogan og siyam,
Sa ato pa, kun moingon ka nga novena, siyam gyud na ka adlaw. Maoy hinungdan nga kinahanglan imo gyung kompletuhon ang siyam ka adlaw otherwise, kun tulo o pito lang ka adlaw, wa ka maka-novena.
Ug sa laing bahin, maoy atong mabasahan ug madunggan ang pulong “mardi gras” referring to the Sinulog parade. Nindot kaayong basahon ug paminawon. Sinulog mardi gras. Apan, nganong “mardi gras” man?
Matag tuig, nagpahinumdom kita nga ang Sinulog dili “mardi gras.” Apan mapasigarbuhon kaayo ang atong mga magsisibya paglitok sa pulong “mardi gras.” Ania, atong i-reprint ang atong pagtuki ning maong isyu:
Ang akong 1957 Modern American Dictionary, mihatag ning mosund nga kahulogan sa Mardi Gras: “Last day before Lent, celebrated in New Orleans, etc, with festivities.”
Ang Collins English Dictionary, sa laing bahin, nagkanayon usab:“Festivities of Shrove Tuesday (Ang Shrove Tuesday is the Tuesday before Ash Wednesday, unang adlaw sa Lent).
Samtang ang Lexicon Webster Dictionary, sa Grolier Book of Knowledge: mihatag usab ning mosunod nga meaning: “Shrove Tuesday; the last day of the carnival, celebrated in Paris, New Orleans and other cities, with parades & special festivities.”
Ang tulo natong tinubdan kun unsa ang “mardi gras,” naghatag og samang kahulogan sa “ mardi gras,” … nga usa ka karnabal, dakung kalingawan sa Paris, New Orleans, ug ubang mga siyudad, gisaulog sa usa ka adlaw sa dili pa ang kwaresma. Sa ato pa, katapusang adlaw sa pagkiat-kiat una mag-Ash Wednesday, unang adlaw sa Lent.
Mao ba ni ang Sinulog “mardi gras?” Ang mardi gras, wa gyu’y relasyon, wala’y koneksiyon sa Sinulog. Ambut nganong ganahan silang mogamit ining pulong “mardi gras.” Tingali tungod kay nindot paminawon.
Sa among panahon, panahon ni kanhi Customs Collector Boy Odilao, niadtong panahona siya ang regional head sa MYSD, iyang gi-introduce ngadto sa ARENA 7 ang Sinulog. Iyang intention mao ang pagdala sa sinulog nga gisayaw sa mga tindera sa kandela, paggawas sa Basilica, ngadto sa kadalanan – apan halad gihapon ngadto sa Sto. Niño.
Mao usab kini ang intensiyon ni Mayor Dodong Solon, sa iyang pagsagop sa Sinulog nga mahimong kasaulogan sa dakbayan sa Sugbo. Dili kiat-kiat, dili paghubog-hubog, dili pagpintal ug paghugawhugaw sa nawong, dili Ati-Atihan, dili Dinagyang, gani gihunong man ang participation sa mga sexing bayot sakay sa float – kondili, ang Sinulog, primarily ug basically, usa ka kasaulogan, usa ka street dancing, halad ug sangpit ngadto sa Batang Hesus.