Giimbitar ko og Christmas party ni Police “General” Vicente Loot didto sa iyang harianong panimalay sa barangay Banilad, dakbayan sa Mandaue kaniadtong Disyembre 28. Kauban nako ang pipila ka sakop sa media. Wala ko magdumili pagtambong kay wala g’yud kami magkita sukad nga nahimo siya nga Chief Superintendent, usa ka ranggo nga katumbas sa “General” diha sa militar.
Daan na man gud kami nga kaila dihang Leiutenant pa ang ranggo ni Loot kaniadto ug nadistino siya sa Criminal Investigation Service (CIS), karon mao na ang Criminal Investigation and Detection Group. Wala pa sila magkahimamat ug ang iyang asawa nga si Mayor Ma. Luisa Loot kaila na ming daan. Giabi-abi ko ni Sir Loot sa iyang “bahalina” nga daw imported kay matud niya “pure” g’yud nga walay sagol, apan dili man isog. Diha si Mayor Loot sa among panag-estoryahay.
Daghan mi og gihisgotan sama sa national politics, local politics ug ubang isyu. Diha pa nako masayri nga si Mayor Loot diay mao ra ang bugtong mayor sa tanang lungsod sa Sugbo nga wala mogamit og sakyanan sa kagamhanan. Wala ko makatoo niini. Ang uban gani nga mayor magpa-isyu man og subra sa usa ka sakyanan nga banos-banosan og gamit kun duna sila’y mga lakaw, apan si Mayor Loot wala?
Apan kini maoy tinuod. Niining bahina, gidayeg kaayo nako si Loot kay lahi siya sa ubang mga mayor. Duna pa kaha’y ubang mga mayor nga sama kaniya?
Aw hinoon, makaingon ko nga swerte lang tingali ang taga Daanbantayan kay nakaangkon sila og mayor nga kwartahan na daan sa pagsulod sa politika. Wala kaayo ko makaila ni Mayor Loot apan wala usab ko makadungog nga duna siya’y binuang aron makakwarta gikan sa salapi sa katawhan.
Mabuhay ka Mayor Loot ug General Loot!
* * *
Gisuroy namo ni Mayor Michael Rama ug sa pipila ka sakop sa media ang nasunogan diha sa Arellano Boulevard. Nakapanglingo-lingo ko kay nalooy ko sa ilang gidangatan.
Tiaw mo panahon karon sa Pasko apan nawad-an sila og balay. Walay ayo ang ilang Bag-ong Tuig. Pag-adto namo sa dapit-nasunogan duna intawo’y nangaon lang ilawom sa mga tulda-tulda didto sa nahabilin nga sunog nila nga balay.
Nalooy ko sa mga biktima sa sunog, apan nakita nako kadtong mga balay nga wala masunog nga silingan sa nasunogan. Daghang mga balay nga anaa na gitukod sa daplin sa karsada. Maayo ba gud na? Kun makakita gani ko og mga ingon niini nga sitwasyon makapanglingo-lingo ko ug mosantop dayon sa akong kaisipan ang SPEED, nga mao ang demolition team sa City Hall.
Maayo lang sa “binahog” kining mga sakop sa SPEED kay bisan og hatagan pa nimo sa mga angayan nila nga himoan og aksyon, dili g’yud mokibo. Mokibo pa ang tubig nga isulod nimo’s balde. Tinuod, kining mga sakop karon sa SPEED wala pa kaniadto dihang kining mga balay gitukod diha sa karsada sa Arellano Boulevard. Apan ang ilang batasan karon pareho ra sa batasan sa mga sakop sa demolition team sa dakbayan kaniadto.
Si SPEED chief Noel Artes pa gani g’yud maoy akong gitug-anan nga may tindahan nga anaa gitukod sa aseras sa Bonifacio ug Sikatuna, apan wala gihapo’y kibo. Walay lihok. Maayo lang mokubra sa sweldo kada petsa 15 ug petsa 30. Ang pangutana kun nganong dili man sila molihok batok niini? Abi kay usa kini ka kan-anan? Makasabot baya intawon ang mga tawo Mr. Artes.