Pasko na nga maoy adlaw nga kasumaran sa pagkahimugso ni Ginoong Hesukristo gikan sa sabakan sa iyang inahan nga si Birhen Maria didto sa pasungan sa mga baka.
Nagmaya ang Kristohanong katilingban sa iyang paghimugso sa kalibutan sanglit natawo na man ang manluluwas sa atong kasal-anan nga gilalang sa Espiritu Santo.
Ang tulo ka mga hari nga nasayod labot sa pagkatawo ni Hesus maoy ilang gihimo ang pagpangita ug nagdala sa ilang mga gasa nga maoy ilang ihalad ngadto sa Balaanong Bata.
Ang tulo ka Hari nga sila si Gaspar, Melchor ug Baltazar mipadangat sa ilang kahinangop ug kalipay ug bugti niini nagdala sila og mga gasa nga ilang gihatag ngadto sa bata nga bag-o lang nga gihimugso.
Kadtong ilang gihimo maoy sinugdanan sa pagtuo nga ang adlaw sa pagkatawo ni Ginoong Hesukristo mao usab ang adlaw sa atong paghinatagay og pinaskohan ngadto sa mga suod nga higala o kabanay padayon man nga gihimo.
Karong tuiga maoy labing lahi nga pagsaulog sa Pasko sa mga Sugboanon tungod kay dili man lang ngadto sa mga higala o sakop sa pamilya ang gihatagan og pinaskohan niining panahona.
Nagkahiusa ang mga Sugboanon sa paghatag og hinabang ngadto sa biktima sa katalagman maisip na lamang nga pinaskohan ngadto sa mga molupyo nga naigo sa katalagman.
Nahimong gaan lamang sa mga Sugboanon ang paghatag og hinabang ngadto sa mga biktima sa katalagman sa Cagayan de Oro City, Iligan City, Dumaguete ug Tanjay sanglit adlaw man karon sa paghinatagay.
Ug bisan unsa ka gamay nga gihatag nga hinabang sa mga Sugboanon ngadto sa mga biktima sa katalagman bililhon na kaayo kini ngadto sa mga hingtungdan sanglit dako man kini og ikatabang alang sa pagbuhi og balik sa nagtinga na nilang kalauman.