EDITORYAL - Buli di angay kompiyansahan

Pila na ka tawo ang namatay kay nadat-ogan sa punoan sa buli nga natumba.

Sa dakbayan sa Mandaue, di pa man hinuon kaayo daghan ang nakabsan og kinabuhi tungod sa punoan sa buli nga natumba.

Kining butanga , di man lisud likayan. Karong tataw na kaayo nga ang punoan sa buli dali rang matumba, aw buot lang ipasabot nga kun gusto kang di matumbahan, ayaw pagpuyo sa dapit nga may punoan sa buli.

Apan kun anaa kana  sa maong lugar, hain man ang imong palabihon, ang pag-alsa sa imong balay o kaha ang pagpuo sa maong buli.

Ang punoan ug ang mga gamot sa buli, masabot sa dakong kasayon nga gabok busa di makapiog kun huypon na sa hangin busa modiretso gyud sa pagkatumba.

Sa mga lugar nga may nagbarug pa nga punoan sa buli, di angay nga piyongan kini sa mga opisyal sa barangay.

Kinahanglang himoon nila ang ilang homework pinaagi sa pagmugna og balaod nga kutob sa buli, lubi, o kaha mga dagkong kahoy nga nagbarug taliwala sa daghang kabalayan, kinahanglang ila kining putlon.

Kini aron sa pagsiguro nga luwas ang kinabuhi sa mga tawo nga anaa sa maong palibot, tungod kay mas bililhon ang kinabuhi sa tawo kay sa kahoy.

Kay kun dili kini buhaton sa mga opisyal sa barangay, mahimong may mga tawong nanag-iya sa punoan sa buli o kaha dagkong kahoy nga masuko kun hilabtan ang ilang mga tanom.

Usahay mopatigbabaw ang garbo sa usa ka tawo nga alang kaniya mas bililhon ang iyang butang kay sa kinabuhi sa mga tawong madat-ogan   sa maong butang.

Pila pa kaha ang mga punoan sa buli, lubi , ug ubang mga dagkong punoan sa kahoy di lamang sa dakbayan sa Mandaue kundi anaa sa nagkalainlaing dapit sa lalawigan nga naghatag og hulga sa kinabuhi sa mga tawo nga anaa sa palibot niini? Ug unsa may gihimo sa gobiyerno? Di ba?