Sa pagsuwat nako ning akong lindog padayon pa ang pag- ihap sa mga namatay ug sa mga wala pa igkita tungod sa pagbisita ni bagyong Sendong dinhi sa Visayas ug Mindanao. Sa Negros mikabat sa 29 ka mga tawo ang patay gumikan sa pag apaw sa tubig sa sapa samtang sa Cagayan de Oro ug Iligan mokabat na sa kapin 600 ka mga tawo ang namatay ingon man 800 kapin ang wala pa igkita sa ilang mga kabanay.
Si Sendong sa iyang pagbisita dinhi sa nasud nagdala lamang og hinay nga hangin apan mibobo og balig usa ka buwan nga uwan sulod lamang sa 24 oras. Si Sendong miigo ug mitugpa sa dapit sa Mindanao nga sa datos sa PAGASA bisitahon lang og bagyo kausa sa dose ka tuig. Ang gidaghanon sa uwan nga gibobo ni Sendong maoy nagmugna sa kusog nga baha nga mibanlas sa kabalayan ug kakahoyan nga iyang maagian. Ang baha ni Sendong miagi panahon sa tingkatulog hinungdan nga daghan sa mga nakatulog ang nangaanod.
Ning adlawa gikatakda nga bisitahon ni Pangulong Aquino ang mga nabiktima sa bagyong Sendong aron personal niyang matan-aw ang ilang kahimtang. Salamat nga nakahunahuna ang Pangulong Aquino sa pagtan-aw sa iyang katawhan nga nagbangutan ug nawagtangan pa gyod og mga pinuy-anan.
Atong gipaabot nga ang nahitabo sa Cagayan de Oro ug Iligan momugna na usab kini og binasulay sa mga opisyal ug katawhan. Magtinokmuray na usab unya niini ang mga ahensiya sa gobyerno nga gitahasan sa pag-monitor ug pagpahimangno sa katawhan mahitungod sa moabot nga kalamidad. Apan sa dili pa sila magtinokmuray kun si kinsa kanila ang angayang manubag kinahanglang maghiusa una sila, maghiusa una kita sa pag-atiman sa mga nabiktima sa bagyo. Mas maayong unahon una nato ang pagpamunit sa tipaka sa ka bangis ni Sendong sa dili pa kamo,sa dili pa kita maglantugi kun si kinsa ang may tulobagon.