EDITORYAL - Ang tiguwang nga gibiyaan sa tanan

Naay usa ka tiguwang babaye nga may I o 2 ka tuig na nga naglubog nianang eskina sa mga dalan Mabini ug Zulueta, kilid nianang opisina sa usa ka Shipping Lines, pagkamakaluluoy sa kahimtang sa maong tiguwang.

Sa miaging tuig makalakaw-lakaw pa siya ug makapangayo pa og limos apan karon naglubog nalang sa iyang hugaw kay halos di na makabangon.

Ambot kun kinsa kaha intawon ang tigpakaon sa maong tiguwang. Kun ikaw makasud-ong kaniya makapangutana ka hain kaha ang mga anak ug kaliwat sa maong tiguwang.

Unya imong sutaon ang imong kaugalingon kun sa imong bahin mahitabo ang ingon niana, diin ang kaugalingon nimong mga anak, mga igsuon ug kaliwat di na motagad kanimo ug ang mga tinugyanan sa kagamhanan wala na usab maghatag og bili kanimo kay sa ilang pagtan-aw usa ka sagbot o kaha sama sa hayop, unsa kaha ka hapdos ang kasakit nga bation sa imong galamhan.

Mas maayo pa man tingale usahay ang baktin sa baboy ug itoy sa iro kay mangita pa usahay sa ilang inahan apan ang mga anak nianang tiguwanga kun ugaling aduna man, asa na kaha.

Kanus-a diay molihok ang taga barangay, ang taga DSWD o kaha ang konsehal sa dakbayan sa Sugbo nga chairman sa social services   o kinsay angay moalima nianang usa ka kalag nga gibiyaan sa maayong kapalaran.

Huwaton ba lang ninyo hangtod nga mabugtoan siya sa kinabuhi sa maong lugar ug anha pa kamo molihok aron sa paglubong kaniya?

Mopalubong kaha mo kaniya nga wa ra ba siya’y kaliwat nga mobutar kaninyo sa panahon sa election? Basin inyo lang kining ipasubad sa iro kun mamatay na siya.

 Kun way mahimo ang   mga opisyal sa barangay nga nagsakop sa maong lugar, sangpiton ta si mayor Mike Rama ug mga konsehal sa dakbayan ug manghinaot ta nga di na sila mangutana kun may kaliwat ba ang maong tiguwang nga mobotar kanila sa umaabot nga election. Di ba?