Computer na pud sa Lapulapu

Nakatimaho ko og lawom nga away niining pagbuhi og balik sa kaso batok ni kanhi mayor ug karon Kongresista Arturo Radaza sa dakbayan sa Lapulapu.

Nanggawas sa mga mantalaan, lakip na sa mga broadsheet sa Manila ang balita nga gipasaka na ang kaso ni Radaza nga gi-imbestigar sa Ombudsman, ngadto sa Sandiganbayan. Ingon ani kalapad ang coverage sa kaso, nga imposible kaayo nga ang filing mahatagan gyud og full coverage.

Sa ato pa, dunay interesado sa mga Radaza.

Kinsa kaha?

* * *

Adunay hungihong nga nanggawas nga kalaki ni Kongresista Tomas Osmeña ang pagbuhi og balik sa kaso.

Sa pagkakaron, lisod pa tuhoan. Pero dunay koneksiyon ang pagtuo sa mga tsismoso kay matud pa si Tomas interesado kaayo sa Mactan Cebu International Airport (MCIA). Interesado, matud pa, mobaligya sa airport.

Nakahibalo na hinuon ang publiko sa pag-apil-apil ni Tomas sa isyu nga pagbaligya sa airport.

Pero unsa may makuha ni Tomas kun tinuod nga interesado kaayo siya mobaligya sa airport sa Mactan?

Kana hinuong mga transaksiyon sama niini, ang mga opisyal nga nag-facilitate sa negosyo seguro man gyud nga maka-kickback. Unya dili lang linibo, kun dili minilyon.

Hapit na usab ang eleksiyon, ang mga politiko nga dagko nagkadagma-dagma na karon og pangita og election fund. Si Tomas, matud nila, daghan man og kuwarta. Unya nganong mamaligya pa man siya og airport?

Tingale, may plano kini nga atbangan ang iyang tinudloan nga si Mayor Mike Rama sa 2013. Unya nasayod naman siya nga panington sad gyud siya kun si Mike iyang ika-atbang, mao nga kinahanglan kaayo ang kuwarta aron i-bankroll sa eleksiyon.

Pun-an pa gyud sa taho nga ang asawa ni Tomas nga si Margot padaganon usab sa south district, samot kadako iyang election budget.

Sumala pa sa mga estorya nga mibanda sa atong dunggan, kining pagbuhi sa kaso himuon kining "bargaining chip" batok sa mga Radaza aron buhian ang airport nga gustong ibaligya.

Kun mao kini, bantayanan diay kaayo ang maong transaksiyon.

* * *

Pero hangtod kanus-a man ang kalbaryo sa usa ka tawo nga gipa-ubos sa imbestigasyon sa Ombudsman?

Dugay naman kini, pero hangtod karon aktibo kaayo si Ombudsman Virginia Palanca-Santiago sa kaso ni Radaza.

Kaniadto ra ba, nagpa-interbiyu sa media si Santiago nga miinsister nga wala gyud magamit ang mga computer nga subject sa imbestigasyon, kay lagi walay kuryente sa isla sa Pangan-an. Miingon pa siya nga nangadaot ang mga computer.

Ang ICT coordinator sa Pangan-an mikonpirmar nga si Santiago miduaw sa Pangan-an niadtong 2005. Apan gihimakak niya ang giingon ni Santiago.

Niadtong miaging semana, ang mga reporters ang mitan-aw og balik sa sitwasyon sa 30 ka mga computers. Ang mga school officials mipakita ngadto sa generator sets nga gigamit sa pagpaandar sa mga computers.

Kinsa man diay ang nagsulti sa tinuod? Si Santiago o ang ICT coordinator sa Pangan-an?