Pagdagsang sa manaygonay

Pagsugod pa lang sa unang adlaw sa Disyembre, nagsauysaoy na ang mga manaygonay sa kabalayan, dili lamang sa siyudad, kun dili hangtod na sa hilit nga dapit. Usa kini ka talan-awon sa komunidad nga ang mga tawo mopahimulos sa panahon nga naghinangat na ang Pasko.

Daghan ang grupo sa mga bata nga manaygonay kay sa mga dagko. Magpulipuli lang sila sa pagpanaygon. Dili kalikayan nga adunay tagbalay nga magbagutbot kay mao pa gani ang paglakaw sa usa ka grupo sa manaygonay, anaa na say laing grupo nga mopuli. Apan malipayon ang mga bata bisa’g hatagan lang nimo’g peso.

Kining maong tradisyon nagpakita lamang nga ang mga bata gusto usab nga mopahimulos sa gihisgotang kahigayonan. Usa ka panahon sa paghinatagay, sa pagpinasayloay ug pagsinabtanay. Aduna usay uban nga moingon nga kausa ra bitaw kini sa usa ka tuig maong may tagbalay usab nga mapahiyumon nga mohatag og kuwarta ngadto sa manaygonay.

Aduna usay mga manaygonay nga bisa’g wala pa moabot ang bulan sa Disyembre, magsugod na sa pagpanaygon. Duha ka matang ang manaygonay. Ang usa giisip nga lingawlingaw lang ang pagpanaygon. Ang laing usa, gihimong panginabuhi ang pagpanaygon. Bisan hain man niining duha, usa ra ang kahulogan niini. Ug kini mao ang paghimamat sa diwa sa Pasko.

Kun mohimamat kita sa Pasko, sama ra nga atong gihimamat ang pagkatawo ni Jesus nga atong Diyos. Mao nga bisan asang komunidad sa atong nasod, ang pagpanaygon kabahin na sa atong kinabuhi isip kita mga Kristiyano.

Makapahimuot ang mga batang manaygonay. Masaksihan nato ang ilang kalipay human sa ilang pagpanaygon. Malipayon silang magbahinay sa ilang gamay nga kita nga kuwarta, unya ipalit dayon nila og pagkaon. Usahay maglalis sila sa pagbahinay sa kuwarta. Apan kay mga bata pa, dali ra molabay ang bation nilang kasilo sa buot sa usa’g-usa, mahibalik dayon ang naandan nilang kinaiya, ang pagka-malipayon.

Busa, angay sabton kining pagdagsang sa mga manaygonay sa komunidad, mabata man o madagko. Sabton nato sila kay tipik na sa atong pagkatawo ang pagpanaygon.