Nalingaw ang duha ka puti

Daghan kanatong mga pasahero og PUJ ang nangreklamo batok niining mga bata -- ug diha pay mga edaran na -- nga mangarol ngari kanato. Gisamokan ta.

* * *

Apan diha toy duha ka puti (Kano ba to sila?) nga pasahero sa PUJ nga nalingaw. Misyonero kadto sila sa usa ka relihiyosong kongregasyon.

* * *

Nidagan na ang jeep apan lang gipugngan ang duha ka bata sa pagkanaug. Ilang gipadayon og kanta og Christmas song sa iningles bisan wa magkadimao ang lyrics.

* * *

Nalingaw ang duha ka puti ug ila pa gani nga gi-tape-record ang kanta. Pag-abot sa laing red traffic light, ilang gitunolan og tag P20 kada usa kanila. Ang duha ka bata nanglayat dayon sa jeep human nagpasalamat.

* * *

Matud pa sa usa ka puti nga nalingaw kaayo siya sa “Silent Night” nga awit sa duha ka bata bisan ang lyrics niini wa makadimao. Gani matud nila mao toy nakapalingaw kanila ug nakahatag hustong diwa sa Pasko kay gikan gayud sa kasingkasing sa duha ka bata.

* * *

TRIVIA -- Malipayong Pasko in advance sa atong mga higala diha sa munisipyo sa San Remegio. Salamat sa inyong suporta sa Banat News.